صوبائی سیکرٹری خزانہ بلوچستان عمران زرکون کا آن لائن بھرتیوں سے متعلق پیغام
صوبائی سیکرٹری خزانہ عمران زرکون نے کہا ہے کہ محکمہ خزانہ میں آن لائن ٹیسٹ اور انٹرویوز کا انعقاد صوبے میں ڈیجیٹلائزیشن کی جانب ایک تاریخی قدم ہے، جس سے بھرتیوں کے عمل میں شفافیت کو فروغ ملے گا۔ انہوں نے واضح کیا کہ سب اکاؤنٹنٹ کی پوسٹ گریڈ 14 کی ہے اور امیدوار افواہوں کے بجائے سرکاری اشتہارات پر اعتماد کریں۔
رپورٹ: سیدہ نتاشا
کوئٹہ: صوبائی سیکرٹری خزانہ بلوچستان عمران زرکون نے کہا کہ محکمہ خزانہ میں آن لائن ٹیسٹ اور انٹرویوز کا انعقاد صوبے میں ڈیجیٹلائزیشن کی جانب ایک تاریخی پیش رفت ہے۔ جدید ٹیکنالوجی کے استعمال سے بھرتیوں کے عمل کو شفاف بنایا جا رہا ہے تاکہ سفارشی، بوگس اور نااہل امیدواروں کی حوصلہ شکنی کی جا سکے۔
انہوں نے کہا کہ آن لائن سسٹم کے ذریعے میرٹ کو یقینی بنایا جائے گا اور ہر امیدوار کو مساوی مواقع فراہم ہوں گے۔ سیکرٹری خزانہ نے گریڈ 14 اور گریڈ 16 سے متعلق پائے جانے والے ابہام کو دور کرتے ہوئے واضح کیا کہ محکمہ خزانہ میں سب اکاؤنٹنٹ کی پوسٹ واضح طور پر گریڈ 14 کی ہے۔
عمران زرکون نے امیدواروں کو ہدایت کی کہ وہ افواہوں اور غیر مصدقہ معلومات پر کان نہ دھریں بلکہ صرف محکمہ خزانہ کے سرکاری اشتہارات اور نوٹیفکیشنز پر ہی اعتماد کریں۔ ان کا کہنا تھا کہ شفاف اور منصفانہ بھرتیوں کے ذریعے صوبے میں ادارہ جاتی اصلاحات کو مزید مضبوط بنایا جا رہا ہے۔
Related News
