حکومتِ بلوچستان کی کوئٹہ میونسپل انتظامیہ کو آوارہ جانوروں کے لیے انسانی اور سائنسی طریقہ کار اپنانے کی ہدایت
حکومتِ بلوچستان نے کوئٹہ میں آوارہ کتوں اور بلیوں کے مسئلے کے حل کے لیے قتل کے بجائے بین الاقوامی معیار کے TNVR طریقہ کار کو اپنانے کی ہدایت جاری کر دی ہے۔ وزیر اعلیٰ میر سرفراز بگٹی کا کہنا ہے کہ جانوروں کا تحفظ ایک مہذب اور ذمہ دار معاشرے کی علامت ہے۔
رپورٹ: سیدہ نتاشا
حکومتِ بلوچستان نے کوئٹہ میونسپل انتظامیہ کو ہدایت جاری کی ہے کہ آوارہ کتوں اور بلیوں کو مارنے کے بجائے بین الاقوامی معیار کے مطابق TNVR (ٹریپ، نیوٹر، ویکسینیٹ، ریلیز) طریقہ کار اپنایا جائے اور جعلی یا غیر معیاری ویکسین کے استعمال سے گریز کیا جائے۔
وزیر اعلیٰ بلوچستان میر سرفراز بگٹی نے کہا ہے کہ آوارہ جانوروں کے مسئلے کا حل قتل نہیں بلکہ جدید، سائنسی اور انسانی طریقہ کار ہے۔ ان کا کہنا تھا کہ “پناہ کوئٹہ” کے تعاون سے شہر میں کتوں اور بلیوں کو محفوظ انداز میں سنبھالنے کا عمل جاری ہے، جو ایک مثبت اور قابلِ تقلید اقدام ہے۔
وزیر اعلیٰ نے عوام سے اپیل کی کہ وہ جانوروں کے تحفظ سے متعلق حکومتی اقدامات میں تعاون کریں تاکہ اس پالیسی پر مؤثر اور مستقل عملدرآمد یقینی بنایا جا سکے۔ انہوں نے مزید کہا کہ بلوچستان اب صرف انسانوں کے لیے ہی نہیں بلکہ جانوروں کے لیے بھی ایک محفوظ صوبہ بنتا جا رہا ہے۔
Related News
