محکمہ صحت بلوچستان میں ڈیجیٹل اصلاحات پر اعلیٰ سطحی ریویو اجلاس
محکمہ صحت بلوچستان کا ایک اہم ریویو اجلاس وزیر صحت بخت محمد کاکڑ کی سربراہی میں کوئٹہ میں منعقد ہوا، جس میں چیف سیکریٹری شکیل قادر خان نے خصوصی شرکت کی۔ اجلاس میں صحت کے شعبے میں ڈیجیٹلائزیشن، مانیٹرنگ سسٹمز اور شفافیت بڑھانے کے اقدامات کا جائزہ لیا گیا۔
رپورٹ: سیدہ نتاشا
محکمہ صحت بلوچستان کی جانب سے تمام ڈویژنل ڈائریکٹرز صحت، ڈسٹرکٹ ہیلتھ آفیسرز، میڈیکل سپرنٹنڈنٹس اور ڈسٹرکٹ سپورٹ مینیجرز کا ایک اہم ریویو اجلاس وزیر صحت بلوچستان بخت محمد کاکڑ کی سربراہی میں منعقد ہوا۔ اجلاس میں چیف سیکریٹری بلوچستان شکیل قادر خان نے خصوصی شرکت کی، جبکہ محکمہ صحت کے اعلیٰ انتظامی و فنی افسران بھی موجود تھے۔
اجلاس کے دوران سیکریٹری صحت بلوچستان مجیب الرحمن پانیزئی نے محکمہ صحت میں جاری ڈیجیٹلائزیشن اور مانیٹرنگ اصلاحات پر جامع بریفنگ دی۔ انہوں نے بتایا کہ جدید ڈیجیٹل نظاموں کے نفاذ سے صحت کے شعبے میں شفافیت، کارکردگی اور عوام کو فراہم کی جانے والی سہولیات میں نمایاں بہتری آ رہی ہے۔
اس موقع پر بلوچستان ہیلتھ مینجمنٹ انفارمیشن سسٹم (BHMIS) کے صوبائی کوآرڈینیٹر ڈاکٹر ابابگر بلوچ نے مختلف ڈیجیٹل ڈیش بورڈز کے ذریعے HRMIS، اے آئی پر مبنی حاضری نظام، ادویات کے انوینٹری مینجمنٹ سسٹم، طبی آلات کے انفارمیشن سسٹم اور وزیر اعلیٰ و وزیر صحت کمپلین سیل مینجمنٹ سسٹم کی عملی صورتحال اور پیش رفت سے اجلاس کو آگاہ کیا۔
شرکاء کو بتایا گیا کہ ان ڈیجیٹل اقدامات سے نہ صرف نگرانی کے نظام کو مؤثر بنایا گیا ہے بلکہ وسائل کے بہتر استعمال اور عوامی شکایات کے بروقت ازالے میں بھی مدد مل رہی ہے۔ وزیر صحت بلوچستان بخت محمد کاکڑ نے ڈیجیٹل اصلاحات کو مزید مؤثر بنانے اور صحت کی سہولیات کی بہتری کے لیے اقدامات جاری رکھنے کی ہدایت کی۔
Related News
