بلوچستان میں صحت کے ڈیٹا کے مؤثر استعمال اور ٹی بی خدمات کی بہتری کے لیے BHMIS اور ٹی بی پروگرام کے حکام کی PPHI سی ای او سے ملاقات
بلوچستان ہیلتھ منجمنٹ انفارمیشن سسٹم (BHMIS) اور ٹی بی کنٹرول پروگرام کے صوبائی کوآرڈینیٹرز نے PPHI بلوچستان کے سی ای او سے ملاقات کی، جس میں صوبے میں صحت کے ڈیٹا کے مؤثر استعمال، بیماریوں کی بروقت تشخیص، اور بنیادی صحت کی سہولیات کی بہتری پر تبادلۂ خیال کیا گیا۔ اجلاس میں ٹی بی تشخیص، ڈیٹا انضمام اور نگرانی کے نظام کو مضبوط بنانے، بی ایچ یو لیول پر ٹی بی سہولیات کی وسعت، اور جدید معیار کے مطابق مراکز قائم کرنے پر زور دیا گیا۔
رپورٹ: سیدہ نتاشا
بلوچستان ہیلتھ منجمنٹ انفارمیشن سسٹم (BHMIS) کے صوبائی کوآرڈینیٹر ڈاکٹر ابابگر بلوچ اور ٹی بی کنٹرول پروگرام کے صوبائی کوآرڈینیٹر ڈاکٹر شیر افگن رہیسانی نے PPHI بلوچستان کے سی ای او ڈاکٹر ایم بی دریجو سے ملاقات کی۔
ملاقات کے دوران صوبے میں صحت کے ڈیٹا کے مؤثر استعمال، بیماریوں کی بروقت تشخیص اور بنیادی صحت کی سطح پر خدمات کی بہتری کے حوالے سے تفصیلی تبادلۂ خیال کیا گیا۔ خصوصی طور پر DHIS-2 کے ذریعے ٹی بی کے کیسز کی رپورٹنگ، ڈیٹا انضمام اور نگرانی کے نظام کو مزید مضبوط بنانے پر مشاورت کی گئی۔
اجلاس میں بی ایچ یو لیول پر ٹی بی کی تشخیص کی سہولیات کو وسعت دینے اور منتخب مراکز کو جدید معیار کے مطابق ٹی بی تشخیصی و مینجمنٹ سینٹرز میں تبدیل کرنے پر زور دیا گیا تاکہ مریضوں کو مقامی سطح پر بروقت اور معیاری سہولیات میسر آئیں اور ریفرلز کا بوجھ کم ہو۔
فریقین نے اس بات پر اتفاق کیا کہ ڈیجیٹل ہیلتھ انفارمیشن سسٹمز کے مؤثر نفاذ، افرادی قوت کی تربیت اور بین الادارہ جاتی تعاون کے ذریعے نہ صرف ٹی بی کنٹرول پروگرام کی کارکردگی میں بہتری لائی جا سکتی ہے بلکہ مجموعی طور پر بنیادی صحت کے نظام کو بھی مضبوط کیا جا سکتا ہے۔ ملاقات کے اختتام پر آئندہ لائحۂ عمل، مشترکہ اقدامات اور تکنیکی معاونت کے تسلسل پر بھی اتفاق کیا گیا۔
Related News
