بلوچستان تھنک ٹینک نیٹ ورک کی کتاب ’’آریانہ سے بلوچستان‘‘ کی شاندار رونمائی

رپورٹ: سیدہ نتاشا
 بلوچستان تھنک ٹینک نیٹ ورک (BTTN) کی کتاب ’’آریانہ سے بلوچستان، وقت کے سفر کی داستان‘‘ کی شاندار رونمائی کی کوئٹہ میں منعقد ہوئی۔ یہ تقریب سینٹر فار انٹرنیشنل اسٹریٹجک اسٹڈیز سندھ  کے تعاون سے منعقد کی گئی، جس میں محققین، اساتذہ، طلبہ، صحافیوں اور مختلف شعبہ جات سے تعلق رکھنے والی اہم شخصیات نے شرکت کی۔
اس جامع اور تحقیقی کتاب میں بلوچستان کی تاریخ و جغرافیہ، روایتی اور غیر روایتی سیکیورٹی چیلنجز، عالمی و علاقائی سیاست میں اس کی اسٹریٹجک اہمیت، معاشی حالات، سماجی پہلوؤں اور مختلف قومیتوں کی ثقافتی شناخت پر تفصیل سے روشنی ڈالی گئی ہے۔ کتاب کو بلوچستان کو کثیرالجہتی انداز میں سمجھنے کے خواہشمند قارئین کے لیے ایک مستند اور قابلِ اعتماد حوالہ قرار دیا جا رہا ہے۔
کتاب بلوچستان تھنک ٹینک نیٹ ورک کے تجربہ کار مصنفین نے مرتب کی ہے، جن کی علمی قابلیت اور تحقیق کے شعبے میں مہارت نے اس کتاب کی ساکھ کو مزید مضبوط بنایا ہے۔ اس موقع پر مقررین نے کہا کہ یہ کتاب نہ صرف تحقیق کے ذخیرے میں اہم اضافہ ہے بلکہ بلوچستان کی تاریخ اور موجودہ تناظر کو سمجھنے میں بھی کلیدی کردار ادا کرے گی۔
تقریب کے دوران BTTN کی 5 سالہ تحقیقی خدمات کا بھی اعتراف کیا گیا۔ شرکاء نے اس بات پر زور دیا کہ بلوچستان میں قائم یہ تھنک ٹینک صوبے کے اہم مسائل اور اسٹریٹجک نوعیت کے امور پر تحقیق کے معتبر مرکز کے طور پر ابھر رہا ہے۔
اختتامی لمحات میں BTTN کی جانب سے اس عزم کا اعادہ کیا گیا کہ ادارہ آئندہ بھی اعلیٰ تحقیقی معیار، علمی دیانت اور پالیسی سازوں کو جامع سفارشات فراہم کرنے کے مشن کو جاری رکھے گا۔