بیوٹمز میں بلوچستان کا سب سے بڑا جاب فئیر، سو سے زائد کمپنیوں کی شرکت

کوئٹہ (جان ہزارہ)
بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز (بیوٹمز) اور بلوچستان بورڈ آف انویسٹمنٹ اینڈ ٹریڈ کے اشتراک سے بیوٹمز یونیورسٹی کوئٹہ میں صوبے کا سب سے بڑا جاب فئیر منعقد کیا گیا۔ اس جاب فئیر میں 100 سے زائد سرکاری و نجی کمپنیاں اور تقریباً 5 ہزار اسٹوڈنٹس نے شرکت کی۔
گورنر بلوچستان شیخ جعفر خان مندوخیل نے فیتہ کاٹ کر فئیر کا افتتاح کیا اور مختلف اسٹالز کا معائنہ کیا۔ افتتاحی تقریب سے رجسٹرار بیوٹمز نے خطاب کرتے ہوئے کہا کہ حکومت بلوچستان اور تمام کمپنیوں کے شکر گزار ہیں جن کی بدولت یہ بڑا جاب فئیر ممکن ہوا۔ ان کا کہنا تھا کہ بیوٹمز ہر سال طلبہ کو مارکیٹ سے جوڑنے کے لیے ایسے مواقع فراہم کرتا ہے۔
بلوچستان بورڈ آف انویسٹمنٹ اینڈ ٹریڈ کے چیئرمین بلال کاکڑ نے اپنے خطاب میں کہا کہ نوجوانوں کے کیریئر کے لیے ایسی تقریب کا انعقاد ہمارے لیے اعزاز کی بات ہے۔
وائس چانسلر بیوٹمز یونیورسٹی ڈاکٹر خالد حفیظ نے کہا کہ گزشتہ سال 60 کمپنیاں شریک تھیں جبکہ اس سال تعداد سو سے زائد ہو گئی ہے۔ کراچی اور اسلام آباد سے بھی بڑی تعداد میں کمپنیاں شریک ہوئیں، جو اس فئیر کی کامیابی کا ثبوت ہے۔
گورنر بلوچستان شیخ جعفر خان مندوخیل نے اپنے خطاب میں کہا کہ بیوٹمز کی جانب سے منعقدہ یہ تقریب قابلِ تحسین ہے جہاں بین الاقوامی کمپنیوں کے نمائندے بھی موجود ہیں۔ انہوں نے کہا کہ بلوچستان کا بڑا مسئلہ بے روزگاری ہے اور اس طرح کے اقدامات نوجوانوں کے لیے امید کا باعث ہیں۔
تقریب میں شریک طلبہ اور مہمانوں کا کہنا تھا کہ اس طرح کے جاب فئیر سے نوجوانوں کو روزگار کے نئے مواقع میسر آئیں گے۔
اختتامی سیشن میں گورنر بلوچستان نے اے سی صدر کوئٹہ حمزہ، چیئرمین بلال کاکڑ اور وائس چانسلر ڈاکٹر خالد حفیظ کو یادگاری شیلڈز پیش کیں، جبکہ بیوٹمز کے وائس چانسلر نے بھی گورنر بلوچستان کو شیلڈ پیش کی۔