وزیر اعلیٰ بلوچستان کا قلات میں دہشت گردوں کے خلاف کامیاب کارروائی پر سیکیورٹی فورسز کو خراجِ تحسین
وزیر اعلیٰ بلوچستان میر سرفراز بگٹی نے ضلع قلات میں دہشت گرد عناصر کے خلاف کامیاب کارروائی پر سیکیورٹی فورسز کی پیشہ ورانہ صلاحیت، جرات اور قومی جذبے کو سراہتے ہوئے کہا ہے کہ ریاست پاکستان دہشت گردی کے خلاف فیصلہ کن جنگ جیتنے کی بھرپور صلاحیت رکھتی ہے۔ انہوں نے واضح کیا کہ امن دشمن عناصر کے خلاف کارروائیاں قومی وژن عزمِ استحکام کا عملی مظہر ہیں۔
رپورٹ: سیدہ نتاشا
وزیر اعلیٰ بلوچستان میر سرفراز بگٹی نے ضلع قلات میں دہشت گرد عناصر کے خلاف کامیاب کارروائی پر سیکیورٹی فورسز کو زبردست خراجِ تحسین پیش کیا ہے۔ اپنے ایک بیان میں انہوں نے کہا کہ سیکیورٹی فورسز نے اعلیٰ پیشہ ورانہ مہارت، جرات اور قومی جذبے کے ساتھ دشمن کے ناپاک عزائم کو ناکام بنایا۔
وزیر اعلیٰ کا کہنا تھا کہ حالیہ آپریشنز کے دوران دہشت گردوں کو انجام تک پہنچایا جانا اس بات کا واضح ثبوت ہے کہ ریاست پاکستان دہشت گردی کے خلاف فیصلہ کن جنگ جیتنے کی مکمل صلاحیت رکھتی ہے۔ انہوں نے کہا کہ امن دشمن عناصر کے خلاف جاری کارروائیاں عزمِ استحکام کے قومی وژن کی عملی تعبیر ہیں، جن کے نتیجے میں ملک بھر میں امن و امان کی صورتحال میں مزید بہتری آ رہی ہے۔
میر سرفراز بگٹی نے اس عزم کا اعادہ کیا کہ بلوچستان سمیت پورے ملک سے دہشت گردی کے مکمل خاتمے کے لیے حکومت، سیکیورٹی ادارے اور عوام ایک صفحے پر ہیں۔ انہوں نے کہا کہ پوری قوم دہشت گردی کے خلاف اس جدوجہد میں اپنی افواج کے شانہ بشانہ کھڑی ہے اور دشمن کو ہر محاذ پر شکست دی جائے گی۔
وزیر اعلیٰ بلوچستان نے واضح کیا کہ پاکستان میں کسی بھی صورت دہشت گردی، تخریب کاری یا بدامنی کی کوئی گنجائش نہیں، اور ریاست ہر حال میں امن، استحکام اور عوام کے جان و مال کے تحفظ کو یقینی بنائے گی۔
Related News
