زیارت میں موسمِ سرما کی پہلی برفباری، سردی کی شدت میں اضافہ
وادیٔ زیارت میں موسمِ سرما کی پہلی برفباری سے سردی کی شدت بڑھ گئی ہے۔ پہاڑی علاقے برف کی سفید چادر میں ڈھک گئے جبکہ ضلعی انتظامیہ نے اہم شاہراہوں کو کھلا رکھنے کے لیے انتظامات مکمل کر لیے ہیں۔
رپورٹ: سیدہ نتاشا
بلوچستان کے سرد ترین علاقوں میں شامل وادیٔ زیارت میں موسمِ سرما کی پہلی برفباری کا سلسلہ گزشتہ شب شروع ہوا جو وقفے وقفے سے صبح تک جاری رہا۔ برفباری کے باعث درجۂ حرارت میں نمایاں کمی ریکارڈ کی گئی جس سے شدید سردی کی لہر محسوس کی جا رہی ہے۔
برف پڑنے کے بعد زیارت اور گردونواح کے پہاڑی علاقے سفید چادر میں ڈھک گئے جس سے علاقے کے قدرتی حسن میں اضافہ ہوا، تاہم سردی بڑھنے کے باعث معمولاتِ زندگی جزوی طور پر متاثر ہونے لگے ہیں۔
ضلعی انتظامیہ کے مطابق زیارت–کوئٹہ اور زیارت–سنجاوی روڈ کو ہر صورت کھلا رکھنے کے لیے مشینری اور عملہ الرٹ کر دیا گیا ہے جبکہ برف ہٹانے کے لیے تمام ضروری انتظامات مکمل ہیں۔ انتظامیہ نے سیاحوں کو ہدایت کی ہے کہ زیارت–کوئٹہ اور زیارت–سنجاوی روڈ پر جاری تعمیراتی کام کے باعث ٹریفک کو مشکلات کا سامنا ہو سکتا ہے، اس لیے سفر سے قبل موسم اور سڑکوں کی صورتحال کے بارے میں معلومات حاصل کریں اور احتیاطی تدابیر اختیار کریں۔
Related News
