ایچ ای سی کا بلوچستان کے طلبہ کے لیے ایل ایل ایم اور پی ایچ ڈی اسکالرشپس کا اعلان

رپورٹ :عروبہ شہزاد 
ہائر ایجوکیشن کمیشن (ایچ ای سی) نے بلوچستان کے ہونہار طلبہ کے لیے مختلف تعلیمی اسکالرشپس کا اعلان کر دیا ہے۔ جاری کردہ اعلان کے مطابق صوبے کے طلبہ کو جامعات میں ایل ایل ایم جبکہ بیرونِ ملک ایل ایل ایم اور پی ایچ ڈی پروگرامز کے لیے اسکالرشپس فراہم کی جائیں گی۔اسکالرشپس کے حصول کے لیے امیدوار کے پاس بلوچستان کا ڈومیسائل اور لوکل سرٹیفکیٹ ہونا لازمی قرار دیا گیا ہے۔ ایل ایل ایم پروگرام کے لیے عمر کی بالائی حد 30 سال جبکہ پی ایچ ڈی کے لیے 35 سال مقرر کی گئی ہے۔ اہل امیدواروں کے لیے اہلیت ٹیسٹ میں کم از کم 50 فیصد نمبر حاصل کرنا ضروری ہوگا۔
ایچ ای سی کے مطابق اسکالرشپس کے لیے درخواستیں جمع کرانے کی آخری تاریخ 13 جنوری 2026 مقرر کی گئی ہے۔علاوہ ازیں ہائر ایجوکیشن کمیشن نے ایل ایل بی ڈگری پروگرام میں داخلے کے لیے لا ایڈمیشن ٹیسٹ کا شیڈول بھی جاری کر دیا ہے، جس کے تحت درخواستیں 29 دسمبر تک جمع کرائی جا سکیں گی، جبکہ لا ایڈمیشن ٹیسٹ 25 جنوری 2026 کو منعقد ہوگا۔