آئی جی ریلویز پولیس کی قومی و بین الاقوامی خاتون باکسر ملائکہ زاہد کی بھرپور حوصلہ افزائی
آئی جی ریلویز پولیس رائے طاہر نے قومی و بین الاقوامی باکسنگ چیمپئن ملائکہ زاہد کی شاندار کامیابیوں پر انہیں سراہتے ہوئے دو لاکھ روپے کا انعام دیا اور مستقبل میں مزید محنت اور تعلیم جاری رکھنے کی تلقین کی۔
رپورٹ: محمد خان کاکڑ
آئی جی ریلویز پولیس رائے طاہر (ہلالِ شجاعت، ستارۂ امتیاز) نے قومی و بین الاقوامی سطح پر پاکستان کا نام روشن کرنے والی باصلاحیت خاتون باکسر ملائکہ زاہد کی بھرپور حوصلہ افزائی کی۔ ملائکہ زاہد، جو ریلویز پولیس کے ہیڈ کانسٹیبل زاہد قیوم کی صاحبزادی اور کوئٹہ کی رہائشی ہیں، اپنی شاندار کارکردگی کے باعث ملک بھر میں پہچان حاصل کر چکی ہیں۔
آئی جی ریلویز پولیس نے سینٹرل پولیس آفس ریلویز میں ملائکہ زاہد کو مدعو کیا، جہاں انہوں نے باکسنگ کے میدان میں غیر معمولی کامیابیوں پر انہیں شاباش دی اور دو لاکھ روپے نقد انعام سے نوازا۔ اس موقع پر آئی جی نے ملائکہ کی محنت، لگن اور مستقل مزاجی کو سراہتے ہوئے انہیں تعلیم جاری رکھنے اور مزید محنت کے ذریعے بین الاقوامی سطح پر کامیابیاں حاصل کرنے کا مشورہ دیا۔
ملائکہ زاہد اب تک قومی ویمن باکسنگ میں 6 جبکہ مختلف ٹورنامنٹس میں مجموعی طور پر 24 گولڈ میڈلز اپنے نام کر چکی ہیں۔ حال ہی میں کراچی میں منعقدہ 35ویں نیشنل گیمز میں بھی انہوں نے شاندار کارکردگی کا مظاہرہ کرتے ہوئے کوارٹر فائنل میں ائیر فورس، سیمی فائنل میں نیوی اور فائنل میں خیبر پختونخوا کی ٹیم کو شکست دے کر گولڈ میڈل حاصل کیا۔ اس کے علاوہ وہ 6 پروفیشنل باکسنگ مقابلوں میں بھی کامیابی حاصل کر چکی ہیں۔
کوئٹہ ڈویژن کے ہیڈ کانسٹیبل زاہد قیوم اور ملائکہ زاہد نے آئی جی ریلویز پولیس کی خصوصی توجہ اور حوصلہ افزائی پر شکریہ ادا کیا۔ اس موقع پر ملائکہ زاہد نے کہا کہ وہ اپنی محنت اور جذبے کو برقرار رکھتے ہوئے مستقبل میں بھی پاکستان کا نام عالمی سطح پر روشن کرتی رہیں ۔
Related News
