کیچ اسپورٹس اینڈ فٹنس فیسٹیول: ویمن اسپورٹس ایونٹس کا شاندار آغاز
کیچ اسپورٹس اینڈ فٹنس فیسٹیول کے چوتھے روز گورنمنٹ گرلز ڈگری کالج تربت میں ویمن اسپورٹس ایونٹس کا باقاعدہ آغاز ہوا۔ افتتاحی تقریب میں ڈپٹی کمشنر کیچ بشیر احمد بڑیچ سمیت معزز شخصیات نے شرکت کی۔ فٹبال، رسہ کشی اور کرکٹ کے مقابلوں میں طالبات نے بھرپور جوش و جذبے سے حصہ لیا۔
رپورٹ: محمد خان کاکڑ
کیچ اسپورٹس اینڈ فٹنس فیسٹیول کے چوتھے روز گورنمنٹ گرلز ڈگری کالج تربت میں ویمن اسپورٹس ایونٹس کی افتتاحی تقریب منعقد ہوئی۔ تقریب کے مہمانِ خصوصی ڈپٹی کمشنر کیچ بشیر احمد بڑیچ تھے، جنہوں نے کبوتروں کو فضا میں آزاد کر کے ویمن گیمز کا باضابطہ افتتاح کیا۔
افتتاحی تقریب میں سابق نگران صوبائی وزیر بلوچستان میر غفور احمد بزنجو، ڈویژنل مانیٹرنگ آفیسر کالجز سر برکت اسماعیل، اسسٹنٹ کمشنر تربت حنیف کبزئی، مختلف تعلیمی اداروں کے سربراہان، اساتذہ اور دیگر معزز شخصیات نے شرکت کی۔
اس موقع پر خطاب کرتے ہوئے ڈپٹی کمشنر کیچ بشیر احمد بڑیچ نے کہا کہ کھیل نوجوانوں خصوصاً طالبات میں خود اعتمادی، نظم و ضبط اور مثبت سوچ کے فروغ میں اہم کردار ادا کرتے ہیں۔ انہوں نے کہا کہ اسپورٹس فیسٹیول جیسے ایونٹس صحت مند معاشرے کی تشکیل میں مددگار ثابت ہوتے ہیں۔
ویمن اسپورٹس ایونٹس کے دوران فٹبال، رسہ کشی اور کرکٹ سمیت مختلف کھیلوں کے دلچسپ مقابلے منعقد ہوئے۔ فٹبال کے مقابلے میں یونیورسٹی آف تربت کی ٹیم نے کامیابی حاصل کی جبکہ رسہ کشی کے مقابلے میں گورنمنٹ ڈگری کالج ہوشاپ کی ٹیم فاتح قرار پائی۔
فیسٹیول سیکرٹری التاز سخی نے کہا کہ کیچ اسپورٹس اینڈ فٹنس فیسٹیول کا مقصد نوجوانوں بالخصوص طالبات میں کھیلوں کے رجحان کو فروغ دینا اور ایک صحت مند، متحرک اور مثبت معاشرے کی بنیاد رکھنا ہے۔ انہوں نے کہا کہ اس طرح کی سرگرمیاں نوجوان نسل کو منفی سرگرمیوں سے دور رکھنے میں بھی معاون ثابت ہوتی ہیں۔
واضح رہے کہ کیچ اسپورٹس اینڈ فٹنس فیسٹیول کے تحت مختلف کھیلوں کے مقابلے آئندہ دنوں میں بھی جاری رہیں گے، جن میں نوجوان کھلاڑی اپنی صلاحیتوں کا مظاہرہ کریں گے۔
Related News
