کوئٹہ پریس کلب میں جینڈر، سیاست اور خواتین کے حقوق پر ایک روزہ تربیتی سیشن
کوئٹہ پریس کلب میں ہارڈ بلوچستان کی جانب سے صحافیوں کے لیے جینڈر، سیاست اور خواتین کے حقوق کے موضوع پر ایک روزہ تربیتی سیشن منعقد کیا گیا۔ سیشن میں مقامی حکومت میں خواتین کے کردار، ذمہ دارانہ صحافت اور ڈیجیٹل ٹولز کے مؤثر استعمال پر زور دیا گیا۔ سینئر صحافیوں نے خطاب کرتے ہوئے کہا کہ خواتین کی شمولیت نچلی سطح پر مثبت تبدیلی لا سکتی ہے اور صحافیوں کا کردار سماجی مسائل کو اجاگر کرنے میں کلیدی اہمیت رکھتا ہے۔
رپورٹ: سیدہ نتاشا
کوئٹہ پریس کلب میں ہارڈ بلوچستان کی جانب سے صحافیوں کے لیے جینڈر، سیاست اور خواتین کے حقوق کے موضوع پر ایک روزہ تربیتی سیشن کا انعقاد کیا گیا۔
تربیتی نشست میں مقامی حکومت میں خواتین کے کردار پر خصوصی طور پر روشنی ڈالی گئی۔ مقررین نے کہا کہ خواتین نہ صرف سماجی بلکہ سیاسی میدان میں بھی مؤثر کردار ادا کر رہی ہیں، اور لوکل گورنمنٹ کے نظام میں ان کی شمولیت فیصلہ سازی کے عمل کو مزید مضبوط اور جامع بناتی ہے۔
سیشن میں سینئر صحافی سلیم شاہد، منظور بلوچ اور ظفر بلوچ نے شرکت کی اور اپنے خیالات کا اظہار کیا۔ مقررین کا کہنا تھا کہ صحافی معاشرتی مسائل کو اجاگر کرنے میں کلیدی کردار ادا کرتے ہیں، خصوصاً خواتین کے حقوق، نمائندگی اور مساوی مواقع جیسے اہم موضوعات پر ذمہ دارانہ رپورٹنگ وقت کی اہم ضرورت ہے۔
انہوں نے مزید کہا کہ مقامی حکومت عوامی مسائل کے حل کا پہلا دروازہ ہے، جہاں خواتین کی مؤثر شمولیت نچلی سطح پر مثبت اور دیرپا تبدیلی کا سبب بن سکتی ہے۔ اس موقع پر صحافیوں کو جدید ڈیجیٹل ٹولز کے ذمہ دارانہ اور مؤثر استعمال کی بھی تلقین کی گئی تاکہ درست اور مستند معلومات بروقت عوام تک پہنچائی جا سکیں۔
تربیتی سیشن کا مقصد صحافیوں کی پیشہ ورانہ صلاحیتوں میں اضافہ کرنا اور انہیں سماجی و سیاسی معاملات میں مثبت، متوازن اور تعمیری کردار ادا کرنے کے لیے تیار کرنا تھا۔
Related News
