بلوچستان میں خواتین اور طالبات کے لیے پنک بس سروس کا آغاز
نئے سال کے آغاز پر بلوچستان حکومت نے خواتین اور طالبات کے لیے پنک بس سروس کا آغاز کر دیا ہے۔ وزیراعلیٰ بلوچستان میر سرفراز بگٹی کے مطابق اس منصوبے کا مقصد خواتین کو محفوظ، باوقار اور سہل سفری سہولیات فراہم کرنا ہے، جبکہ آئندہ مرحلوں میں اس سروس کو دیگر اضلاع تک بھی توسیع دی جائے گی۔
رپورٹ: سیدہ نتاشا
نئے سال کے آغاز کے موقع پر صوبائی حکومت نے بلوچستان میں خواتین اور طالبات کے لیے پنک بس سروس کا باقاعدہ آغاز کر دیا ہے۔ وزیراعلیٰ بلوچستان میر سرفراز بگٹی نے کہا ہے کہ پنک بس سروس کا بنیادی مقصد خواتین اور طالبات کی روزمرہ آمد و رفت کو محفوظ، آرام دہ اور باوقار بنانا ہے۔
وزیراعلیٰ کا کہنا تھا کہ حکومت کی اولین ترجیح ہے کہ اس سروس کو مستقل بنیادوں پر جاری رکھا جائے تاکہ خواتین بلاخوف و خطر تعلیمی اداروں، دفاتر اور صحت کی سہولیات تک رسائی حاصل کر سکیں۔ انہوں نے واضح کیا کہ آئندہ مرحلے میں پنک بس سروس کا دائرہ کار کوئٹہ سے بڑھا کر صوبے کے دیگر اضلاع تک پھیلایا جائے گا۔
میر سرفراز بگٹی کے مطابق پنک بس سروس خواتین کو تعلیم، روزگار اور صحت کی بنیادی سہولیات تک آسان رسائی فراہم کرے گی، جو صوبائی حکومت کے اصلاحاتی ایجنڈے کا اہم حصہ ہے۔ وزیراعلیٰ نے سوشل میڈیا پلیٹ فارم ایکس (سابقہ ٹوئٹر) پر اپنے پیغام میں کہا کہ بلوچستان میں خواتین کو بااختیار بنانے کے لیے عملی اقدامات کا سلسلہ جاری رہے گا اور خواتین کے لیے محفوظ ٹرانسپورٹ نظام حکومت کی ترجیحات میں سرفہرست ہے۔
Related News
