کوئٹہ میں افغان مہاجرین کی ملک بدری اور سرچ آپریشنز میں تیزی
بلوچستان کے دارالحکومت کوئٹہ میں افغان مہاجرین کی واپسی کے عمل کو مزید تیز کر دیا گیا ہے۔ پولیس اور ضلعی انتظامیہ نے مختلف علاقوں میں سرچ آپریشنز شروع کر دیے ہیں اور متعدد غیر قانونی مقیم افغان شہریوں کو حراست میں لے لیا گیا ہے۔ انتظامیہ کا کہنا ہے کہ ملک بدری کی کارروائیاں قانون کے مطابق تیزی سے جاری رہیں گی۔
رپورٹ: سیدہ نتاشا
افغان مہاجرین کی واپسی کے عمل میں مزید تیزی لائی گئی ہے، خاص طور پر بلوچستان کے دارالحکومت کوئٹہ میں۔ پولیس اور ضلعی انتظامیہ نے مختلف علاقوں میں سرچ آپریشنز شروع کر دیے ہیں تاکہ غیر قانونی مقیم افغان شہریوں کی نشاندہی اور گرفتاری کی جا سکے۔
ذرائع کے مطابق، کوئٹہ کے مختلف علاقوں میں ایس ایچ اوز کی نگرانی میں چھاپے مارے جا رہے ہیں اور دکانوں، مارکیٹوں سمیت عوامی مقامات پر بھی افغان مہاجرین کی تلاش جاری ہے۔ اس دوران متعدد غیر قانونی مقیم افراد کو حراست میں لے لیا گیا ہے۔
گذشتہ روز خروٹ آباد سے گرفتار افغان مہاجرین کو انتظامیہ کی جانب سے آج ملک بدر کیے جانے کا امکان ہے۔ حکام کا کہنا ہے کہ ملک بدری کا اگلا مرحلہ فعال ہو چکا ہے اور کارروائیاں قانون کے مطابق منظم انداز میں تیزی سے جاری رہیں گی۔
حکام نے شہریوں سے اپیل کی ہے کہ وہ تعاون کریں اور کسی بھی غیر قانونی سرگرمی کی اطلاع فوری طور پر متعلقہ حکام کو دیں تاکہ عمل درآمد موثر اور قانون کے دائرے میں رہے۔
.jpeg)
