بلوچستان میں ایم ایچ وی آر اے گائیڈ لائنز پر جائزہ اجلاس منعقد
بلوچستان میں ملٹی ہیزرڈ ولنریبلٹی اینڈ رسک اسیسمنٹ (MHVRA) گائیڈ لائنز پر عملدرآمد کے حوالے سے پی ڈی ایم اے بلوچستان میں ایک اہم جائزہ اجلاس منعقد ہوا، جس میں آفات کے خطرات میں کمی اور مؤثر ترقیاتی منصوبہ بندی پر زور دیا گیا۔
رپورٹ: جان ہزارہ
بلوچستان میں ملٹی ہیزرڈ ولنریبلٹی اینڈ رسک اسیسمنٹ (MHVRA) کے انعقاد سے متعلق گائیڈ لائنز پر جائزہ اجلاس آج پروونشل ڈیزاسٹر مینجمنٹ اتھارٹی (پی ڈی ایم اے) بلوچستان میں منعقد ہوا۔ اجلاس کی صدارت ڈائریکٹر پلاننگ اینڈ کوآرڈینیشن نے کی۔
اجلاس میں نیشنل ڈیزاسٹر مینجمنٹ اتھارٹی (این ڈی ایم اے) کے ٹیکنیکل ونگ کی جانب سے تیار کردہ ایم ایچ وی آر اے گائیڈ لائنز کا تفصیلی جائزہ لیا گیا، جن کا مقصد بلوچستان میں آفات کے خدشات کے مؤثر تجزیے اور خطرات میں کمی کے لیے ایک جامع فریم ورک فراہم کرنا ہے۔
اس موقع پر ڈپٹی ڈائریکٹر پی ڈی ایم اے بلوچستان جناب اصغر علی جمایلی نے اجلاس میں فعال شرکت کرتے ہوئے گائیڈ لائنز پر اہم اور قیمتی تجاویز پیش کیں۔ انہوں نے کہا کہ ایم ایچ وی آر اے مطالعات صوبے کے تمام ترقیاتی شعبوں کے لیے بنیادی ڈیٹا کی حیثیت رکھتے ہیں، جو پائیدار ترقی اور مضبوط انفراسٹرکچر کے قیام میں کلیدی کردار ادا کریں گے۔
انہوں نے مزید کہا کہ ان مطالعات پر مؤثر عملدرآمد کے ذریعے سیلاب سمیت دیگر قدرتی آفات کے خطرات میں نمایاں کمی لائی جا سکتی ہے، جس سے بلوچستان بھر میں ایک محفوظ اور مستحکم معاشرے کی تشکیل ممکن ہو سکے گی۔
اجلاس کے شرکاء نے اس بات پر اتفاق کیا کہ ایم ایچ وی آر اے گائیڈ لائنز پر بروقت اور مؤثر عملدرآمد صوبے میں قدرتی آفات سے نمٹنے، رسک مینجمنٹ کو بہتر بنانے اور ترقیاتی منصوبہ بندی کو مضبوط بنیادوں پر استوار کرنے کے لیے نہایت اہم ہے۔
Related News
