بلوچستان کے کھیل کے میدانوں میں نئی جان، کوئٹہ میں بین الاقوامی فٹبال تربیتی پروگرام کا آغاز
بلوچستان میں فٹبال سرگرمیوں کے فروغ کے لیے اہم پیش رفت سامنے آئی ہے۔ 63 نوجوان فٹبالرز، جن میں 12 خواتین کھلاڑی بھی شامل ہیں، کو بین الاقوامی معیار کی تربیت فراہم کرنے کے لیے 6 رکنی غیر ملکی کوچنگ ٹیم کوئٹہ پہنچ گئی ہے۔ وزیر اعلیٰ بلوچستان میر سرفراز بگٹی کے مطابق یہ اقدام صوبے میں کھیلوں کے فروغ اور نوجوان ٹیلنٹ کو عالمی سطح تک لے جانے کے عزم کا عملی اظہار ہے۔
رپورٹ: سیدہ نتاشا
بلوچستان کے کھیل کے میدان ایک بار پھر آباد ہونے لگے ہیں اور صوبے میں فٹبال سرگرمیوں میں نمایاں اضافہ دیکھنے میں آ رہا ہے۔ اس سلسلے میں 63 نوجوان فٹبالرز کو بین الاقوامی معیار کی تربیت فراہم کرنے کے لیے 6 رکنی غیر ملکی کوچنگ ٹیم کوئٹہ پہنچ گئی ہے۔ تربیتی پروگرام میں 12 خواتین کھلاڑیوں کی شمولیت کو کھیلوں میں صنفی شمولیت کی جانب ایک مثبت قدم قرار دیا جا رہا ہے۔
وزیر اعلیٰ بلوچستان میر سرفراز بگٹی نے کہا ہے کہ غیر ملکی کوچز کی نگرانی میں جدید اور پروفیشنل تربیتی سیشنز کا انعقاد خوش آئند ہے، جس سے کھلاڑیوں کی فنی، جسمانی اور پیشہ ورانہ صلاحیتوں میں نمایاں بہتری آئے گی۔ ان کا کہنا تھا کہ ان سیشنز سے نوجوان کھلاڑیوں کے حوصلے اور اعتماد میں اضافہ ہوگا اور وہ قومی و بین الاقوامی سطح پر بہتر کارکردگی کا مظاہرہ کر سکیں گے۔
وزیر اعلیٰ نے مزید کہا کہ صوبائی حکومت کھیلوں کے فروغ اور نوجوان ٹیلنٹ کو آگے لانے کے لیے بھرپور سرمایہ کاری کر رہی ہے۔ بلوچستان کے کھلاڑیوں کو قومی اور بین الاقوامی مواقع فراہم کرنا حکومت کی اولین ترجیحات میں شامل ہے، تاکہ صوبے کا مثبت تشخص اجاگر ہو اور نوجوانوں کو صحت مند سرگرمیوں کی جانب راغب کیا جا سکے۔
Related News
