بلوچستان کی اعلیٰ تعلیمی قیادت کیلئے 3 روزہ اسٹریٹجک پلاننگ و لیڈرشپ ایکسیلنس ورکشاپ
بلوچستان کی 11 سرکاری جامعات کی قیادت کیلئے 3 روزہ اسٹریٹجک پلاننگ اینڈ لیڈرشپ ایکسیلنس ورکشاپ NAHE نے HEC کی سرپرستی میں گورنر بلوچستان جعفر خان مندوخیل کی خصوصی ہدایات پر منعقد کی۔ ورکشاپ میں اسٹریٹجک پلاننگ، کوالٹی ایشورنس، ڈیجیٹل ٹرانسفارمیشن اور فنانشل سسٹین ایبلٹی پر تفصیلی گفتگو کی گئی۔ قومی ماہرین نے بلوچستان کی جامعات کو درپیش مخصوص چیلنجز اور ان کے حل پر بھی روشنی ڈالی۔
رپورٹ: سیدہ نتاشا
بلوچستان کی اعلیٰ تعلیمی قیادت کے لیے 3 روزہ اسٹریٹجک پلاننگ اینڈ لیڈرشپ ایکسیلنس ورکشاپ نیشنل اکیڈمی آف ہائر ایجوکیشن (NAHE) نے ہائر ایجوکیشن کمیشن (HEC) کی سرپرستی میں گورنر بلوچستان عزت مآب جعفر خان مندوخیل کی خصوصی ہدایات پر منعقد کی۔
اس ورکشاپ کا مقصد صوبے کی 11 سرکاری جامعات کی قیادت کو بااختیار بنانا، ان کی انتظامی صلاحیتوں کو مضبوط کرنا اور انہیں عالمی معیار کی درسگاہوں کے ہم پلہ لانے کے لیے معاونت فراہم کرنا تھا۔ ورکشاپ میں وائس چانسلرز، پرو وائس چانسلرز اور دیگر اعلیٰ تعلیمی عہدیداران نے بھرپور شرکت کی۔
ڈاکٹر ملک نے کہا کہ بلوچستان کی تعلیمی قیادت کو پہلی بار ایک ہی پلیٹ فارم پر HEC کی اعلیٰ قیادت کے ساتھ براہِ راست گفتگو اور مشاورت کا موقع ملا ہے، جہاں اسٹریٹجک پلاننگ، کوالٹی ایشورنس، ڈیجیٹل ٹرانسفارمیشن اور فنانشل سسٹین ایبلٹی جیسے اہم موضوعات پر تفصیلی سیشن منعقد کیے گئے۔
انہوں نے مزید کہا کہ اس ورکشاپ میں شرکت کرنے والے معروف قومی ماہرین نے بلوچستان کی جامعات کو درپیش ان مخصوص چیلنجز کا احاطہ بھی کیا جو ملک کے دیگر صوبوں سے مختلف ہیں۔ ڈاکٹر ملک نے اس بات کا بھرپور اعتماد ظاہر کیا کہ گورنر بلوچستان کا وژن اس اہم اقدام کے ذریعے عملی صورت اختیار کرے گا، جو اعلیٰ تعلیم کے شعبے میں طویل المدتی مثبت تبدیلیوں کا باعث بنے گا۔
NAHE کے مطابق اس ورکشاپ کے بعد مزید فالو اپ پروگرامز کی منصوبہ بندی بھی کی جا رہی ہے تاکہ بلوچستان کی جامعات کے لیے یہ ترقیاتی سفر تسلسل کے ساتھ جاری رہے۔
Related News
