دکی کا مشہور تربوز عروج کے سیزن میں، مقامی معیشت اور زرعی شناخت کو فروغ

دکی کا مشہور تربوز اپنی قدرتی مٹھاس اور بہترین ذائقے کے باعث ایک بار پھر عروج کے سیزن میں پہنچ چکا ہے۔ یہ فصل نہ صرف مقامی کسانوں کے لیے روزگار کا ذریعہ ہے بلکہ بلوچستان کی زرعی شناخت بھی بن چکی ہے۔

رپورٹ : دکی

دکی کا مشہور تربوز ایک بار پھر اپنے عروج کے سیزن میں پہنچ چکا ہے۔ اپنی قدرتی مٹھاس، بہترین ذائقے اور اعلیٰ معیار کے باعث یہ ملک بھر کے لوگوں کی توجہ حاصل کر رہا ہے۔

ضلع دکی کے علاقوں لونی اور نانا صاحب زیارت میں وسیع پیمانے پر تربوز کی کاشت کی جاتی ہے، جہاں اس سال بھی پیداوار تسلی بخش رہی۔ مقامی کاشتکاروں کے مطابق یہ فصل نہ صرف زرعی سرگرمیوں کو فروغ دے رہی ہے بلکہ سینکڑوں خاندانوں کے روزگار کا بھی اہم ذریعہ ہے۔

روزانہ سینکڑوں ٹرک، مزدا اور پک اپ گاڑیاں دکی سے تربوز لوڈ کرکے کوئٹہ، ژوب، قلعہ سیف اللہ، لورالائی، پنجاب اور ملک کے دیگر شہروں کی منڈیوں تک پہنچا رہی ہیں۔ دکی کا تربوز اپنی رس دار ساخت، خوش ذائقگی اور منفرد مٹھاس کی وجہ سے خاص پہچان رکھتا ہے۔

ماہرین کے مطابق گرمیوں کے موسم میں تربوز جسم کو ٹھنڈک فراہم کرنے، پانی کی کمی پوری کرنے اور صحت بہتر بنانے میں اہم کردار ادا کرتا ہے۔

مقامی شہریوں کا کہنا ہے کہ دکی کا تربوز اب صرف ایک فصل نہیں بلکہ ضلع کی زرعی شناخت بن چکا ہے، جو مقامی معیشت کو بھی مضبوط سہارا فراہم کر رہا ہے۔