وادی بغاو: ضلع دکی کا دلکش قدرتی سیاحتی مقام

ضلع دکی کے قریب وادی بغاو اپنی قدرتی خوبصورتی، چشموں اور دلکش مناظر کی وجہ سے سیاحوں کی توجہ کا مرکز بنی ہوئی ہے۔ مقامی افراد کے مطابق بنیادی سہولیات کی فراہمی سے یہ وادی ایک اہم سیاحتی مقام بن سکتی ہے اور روزگار کے مواقع بھی بڑھ سکتے ہیں۔

رپورٹ: دکی

بلند پہاڑ، سرسبز مناظر، بہتے چشمے اور شفاف ندیاں۔۔۔ قدرتی حسن کا ایک بے مثال شاہکار۔۔۔ یہ ہے وادی بغاو، ضلع دکی سے تقریباً 25 کلومیٹر کے فاصلے پر واقع حسین وادی۔
جس کو بلوچستان کے دلکش ترین مقامات میں شمار کیا جاتا ہے۔ تعطیلات اور پکنک کے دنوں میں دکی اور گردونواح سے بڑی تعداد میں لوگ یہاں کا رخ کرتے ہیں۔ ٹھنڈے پانی کے چشمے، پرسکون ماحول اور دل موہ لینے والے مناظر سیاحوں کو اپنی جانب کھینچ لاتے ہیں۔ نوجوان یہاں قدرتی ماحول سے لطف اندوز ہوتے ہیں، پکنک مناتے ہیں اور روایتی موسیقی و رقص کے ذریعے اپنی خوشیوں کا اظہار کرتے ہیں۔مقامی عوام کا کہنا ہے کہ اگر حکومت اس خوبصورت مقام پر بنیادی سہولیات فراہم کرے، سڑکوں کو بہتر بنائے، پینے کے صاف پانی، واش رومز، پارکنگ اور فیملیز کے لیے مناسب تفریحی مقامات کا انتظام کرے تو وادی بغاو بلوچستان کے نمایاں سیاحتی مراکز میں شامل ہوسکتی ہے۔عوام کے مطابق اس سے نہ صرف سیاحت کو فروغ ملے گا بلکہ مقامی سطح پر روزگار کے نئے مواقع بھی پیدا ہوں گے۔ وادی بغاو قدرت کا ایک قیمتی تحفہ ہے، جس کی حفاظت، ترقی اور خوبصورتی کو برقرار رکھنا ہم سب کی مشترکہ ذمہ داری ہے۔