جھالاوان فیسٹیول 2026 میں بی یو ای ٹی خضدار کے طلباء کا مصنوعی ذہانت پر مبنی برین ٹیومر ڈیٹیکشن پروجیکٹ پیش

بلوچستان کے تاریخی شہر خضدار میں منعقدہ جھالاوان فیسٹیول 2026 میں علم، ٹیکنالوجی اور ثقافت کا ایک منفرد امتزاج دیکھنے کو ملا۔ فیسٹیول کے دوران بلوچستان یونیورسٹی آف انجینئرنگ اینڈ ٹیکنالوجی خضدار کے طلباء و طالبات نے مصنوعی ذہانت پر مبنی ایک جدید اور منفرد منصوبہ پیش کر کے حاضرین کی بھرپور داد سمیٹی۔

پیش کیے گئے منصوبے کا عنوان “برین ٹیومر ڈیٹیکشن یو سنگ اے آئی بیسڈ وی جی جی 16” تھا، جسے جامعہ کے ذہین طلباء و طالبات نے تیار کیا۔ یہ جدید نظام ایم آر آئی اسکین کی تصاویر کا تجزیہ کر کے چند سیکنڈز میں یہ معلوم کرنے کی صلاحیت رکھتا ہے کہ مریض کے دماغ میں ٹیومر موجود ہے یا نہیں۔

وی جی جی 16 ڈیپ لرننگ ماڈل پر مبنی یہ سسٹم 95.21 فیصد درستگی کے ساتھ تشخیص کرنے کی صلاحیت رکھتا ہے، جبکہ یہ تصویر میں ٹیومر سے متاثرہ حصے کو سرخ رنگ سے نمایاں بھی کرتا ہے تاکہ بیماری کی نشاندہی مزید واضح ہو سکے۔

طلباء کے مطابق اس منصوبے کا بنیادی مقصد برین ٹیومر کی ابتدائی تشخیص کو ممکن بنانا ہے تاکہ مریضوں کو بروقت طبی امداد اور علاج فراہم کیا جا سکے۔ ماہرین نے اس منصوبے کو صحت کے شعبے میں ایک اہم پیش رفت قرار دیتے ہوئے کہا کہ یہ نظام ڈاکٹروں کے لیے معاون ثابت ہو سکتا ہے، تشخیص کے عمل کو تیز بنا سکتا ہے اور دور دراز علاقوں میں بھی بہتر طبی سہولیات کی فراہمی میں مددگار ثابت ہو سکتا ہے۔

فیسٹیول میں شریک ماہرین اور شرکاء نے اس منصوبے کو نہ صرف بلوچستان بلکہ پورے پاکستان کے لیے باعثِ فخر قرار دیا۔ بلوچستان یونیورسٹی آف انجینئرنگ اینڈ ٹیکنالوجی خضدار کے طلباء نے ایک بار پھر ثابت کیا کہ نوجوان نسل تعلیم کے ساتھ ساتھ قومی مسائل کے حل کے لیے بھی عملی کردار ادا کر رہی ہے۔

اس موقع پر خضدار ٹیچنگ ہسپتال کے میڈیکل سپرنٹنڈنٹ بھی موجود تھے، جنہوں نے اس جدید ٹیکنالوجی کو محکمہ صحت کے لیے ایک انقلابی قدم قرار دیتے ہوئے کہا کہ اس سے برین ٹیومر کے مریضوں کی جلد تشخیص اور بروقت علاج میں نمایاں مدد مل سکے گی۔

جھالاوان فیسٹیول 2026 میں پیش کیا گیا یہ منفرد منصوبہ اس بات کا واضح ثبوت ہے کہ جب ثقافت اور ٹیکنالوجی ایک ساتھ آگے بڑھتے ہیں تو خواب حقیقت کا روپ دھار لیتے ہیں۔

 ,Keywords: Jhalawan Festival 2026, Khuzdar, Balochistan ,Balochistan news