اساتذہ کی مبینہ غیرقانونی تقرریاں، اینٹی کرپشن کی سی ٹی ایس پی کے سی ای او کو طلبی

کوئٹہ میں اساتذہ کی مبینہ غیرقانونی تقرریوں کی تحقیقات کے سلسلے میں اینٹی کرپشن اسٹیبلشمنٹ بلوچستان نے ٹیسٹنگ سروس سی ٹی ایس پی کے سی ای او فیصل کاکڑ کو 7 جنوری کو طلب کر لیا ہے۔ عدم حاضری کی صورت میں قانونی کارروائی کی جائے گی۔

رپورٹ: سیدہ نتاشا

صوبے میں اساتذہ کی مبینہ غیرقانونی تقرریوں کے معاملے پر اینٹی کرپشن اسٹیبلشمنٹ بلوچستان کی تحقیقات جاری ہیں۔ تحقیقات کے سلسلے میں ٹیسٹنگ سروس سی ٹی ایس پی کے چیف ایگزیکٹو آفیسر فیصل کاکڑ کو طلب کر لیا گیا ہے۔

اینٹی کرپشن حکام کے مطابق فیصل کاکڑ کو سیکشن 160 ضابطہ فوجداری کے تحت طلبی نوٹس جاری کیا گیا ہے، جس میں انہیں 7 جنوری کو اینٹی کرپشن دفتر، ریلوے ہاؤسنگ سوسائٹی جوائنٹ روڈ کوئٹہ میں پیش ہونے کی ہدایت کی گئی ہے۔
اعلامیے میں واضح کیا گیا ہے کہ مقررہ تاریخ پر پیش نہ ہونے کی صورت میں قانون کے مطابق کارروائی عمل میں لائی جائے گی۔ اینٹی کرپشن حکام کا کہنا ہے کہ شفاف تحقیقات کو یقینی بنانے کے لیے تمام متعلقہ افراد سے پوچھ گچھ کی جا رہی ہے۔