بلوچستان ہیلتھ کارڈ پروگرام: صوبائی صحت کے نظام میں بہتری کی جانب اہم پیش رفت

بلوچستان ہیلتھ کارڈ پروگرام کے تحت صوبے بھر میں ہسپتالوں کی مانیٹرنگ کا عمل جاری ہے، جس کا مقصد عوام کو معیاری اور بروقت طبی سہولیات فراہم کرنا اور صحت کے نظام میں شفافیت کو یقینی بنانا ہے۔

رپورٹ: سیدہ نتاشا

وزیراعلیٰ بلوچستان میر سرفراز بگٹی کے وژن اور صوبائی وزیر صحت بخت محمد کاکڑ کی قیادت میں بلوچستان ہیلتھ کارڈ پروگرام صوبے کے صحت کے نظام میں بہتری کے لیے اہم کردار ادا کر رہا ہے۔
حکومت کے اصلاحاتی ایجنڈے کے تحت بلوچستان ہیلتھ کارڈ پروگرام اور اسٹیٹ لائف انشورنس کارپوریشن کی مشترکہ مانیٹرنگ ٹیم صوبے بھر کے منظور شدہ ہسپتالوں کے دورے کر رہی ہے، جہاں طبی سہولیات اور خدمات کا تفصیلی جائزہ لیا جا رہا ہے۔

اس مانیٹرنگ کا مقصد عوام کو معیاری، بروقت اور باوقار علاج کی فراہمی کو یقینی بنانا ہے، جبکہ ہسپتالوں کی کارکردگی کو بہتر بنانے اور مریضوں کو درپیش مسائل کے فوری حل پر بھی توجہ دی جا رہی ہے۔
حکام کے مطابق یہ اقدامات صحت کے شعبے میں شفافیت، بہتری اور اعتماد کے فروغ میں مددگار ثابت ہو رہے ہیں۔
بلوچستان ہیلتھ کارڈ پروگرام ایک اہم اور انقلابی قدم کے طور پر سامنے آ رہا ہے، جس کے ذریعے عام شہریوں کو علاج کی سہولیات تک آسان رسائی حاصل ہو رہی ہے اور صوبے کا صحت کا نظام جدید خطوط پر استوار کیا جا رہا ہے۔