کوئٹہ میں نئے پیپر لیس ٹرامہ سینٹر کا وزیر صحت بلوچستان کی جانب سے جائزہ

کوئٹہ میں وزیر صحت بلوچستان بخت محمد کاکڑ نے نئے تعمیر شدہ ٹرامہ سینٹر میں حکومت کی پیپر لیس پالیسی کے تحت نصب جدید سافٹ ویئر کا جائزہ لیا۔ صوبائی کوآرڈینیٹر BHMIS ڈاکٹر ابابگر بلوچ نے مریضوں کے اندراج، تشخیص، علاج اور فالو اپ کے ڈیجیٹل نظام کے حوالے سے تفصیلی بریفنگ دی۔ وزیر صحت نے کہا کہ ڈیجیٹل نظام سے مریضوں کی سہولت، ہسپتالوں کی کارکردگی اور وسائل کی بچت میں اضافہ ہوگا، اور ہدایت دی کہ تمام سرکاری ہسپتالوں کو مرحلہ وار HMIS سسٹم پر منتقل کیا جائے۔

رپورٹ: سیدہ نتاشا

کوئٹہ میں وزیر صحت بلوچستان بخت محمد کاکڑ نے نئے تعمیر شدہ ٹرامہ سینٹر کا دورہ کیا اور حکومتِ بلوچستان کی پیپر لیس انوائرمنٹ پالیسی کے تحت نصب کیے گئے جدید سافٹ ویئر کا تفصیلی جائزہ لیا۔ اس موقع پر اسپیشل سیکریٹری محکمہ صحت شئے حق بلوچ، ٹرامہ سینٹر کے میڈیکل ڈائریکٹر ڈاکٹر کامران کاسی، محکمہ صحت کے ڈپٹی سیکریٹریز اور دیگر متعلقہ افسران بھی موجود تھے۔
دورے کے دوران صوبائی کوآرڈینیٹر بلوچستان ہیلتھ مینجمنٹ انفارمیشن سسٹم (BHMIS) ڈاکٹر ابابگر بلوچ نے وزیر صحت کو سافٹ ویئر کے مختلف ماڈیولز، مریضوں کے اندراج، تشخیص، علاج، ادویات اور فالو اپ کے حوالے سے تفصیلی بریفنگ دی۔ انہوں نے بتایا کہ نئے ٹرامہ سینٹر کو مکمل طور پر کاغذ سے آزاد بنایا گیا ہے اور تمام مریضوں کا ریکارڈ HMIS کے ذریعے ڈیجیٹلائز کر دیا گیا ہے۔

وزیر صحت بخت محمد کاکڑ نے کہا کہ یہ اصلاحات وزیر اعلیٰ بلوچستان میر سرفراز خان بگٹی کے وژن کے مطابق کی جا رہی ہیں، تاکہ صوبے میں صحت کے نظام کو جدید خطوط پر استوار کیا جا سکے اور عوام کو شفاف، معیاری اور بروقت طبی سہولیات فراہم کی جائیں۔ انہوں نے مزید کہا کہ ڈیجیٹل اور پیپر لیس نظام سے نہ صرف وسائل کی بچت ہوگی بلکہ مریضوں کی سہولت اور ہسپتالوں کی کارکردگی میں بھی نمایاں بہتری آئے گی۔
بریفنگ کے دوران یہ بھی بتایا گیا کہ مرحلہ وار کوئٹہ کے تمام سرکاری ہسپتالوں کو مکمل HMIS سسٹم پر منتقل کیا جائے گا تاکہ صوبے بھر میں صحت کی خدمات کو یکساں اور مربوط ڈیجیٹل نظام کے تحت فراہم کیا جا سکے۔ وزیر صحت نے ہدایت کی کہ سسٹم کے مؤثر نفاذ کے لیے عملے کی مکمل تربیت اور مسلسل مانیٹرنگ کو یقینی بنایا جائے۔