35ویں نیشنل گیمز میں شاندار کارکردگی دکھانے والے بلوچستان کے کھلاڑیوں کے اعزاز میں عظیم الشان تقریب کا اعلان

سیکرٹری کھیل بلوچستان درا بلوچ نے اعلان کیا ہے کہ 35ویں نیشنل گیمز میں نمایاں کارکردگی دکھانے والے بلوچستان کے کھلاڑیوں کے اعزاز میں جلد ایک پروقار تقریب منعقد کی جائے گی، جس میں انہیں کیش انعامات دیے جائیں گے۔ تقریب میں وزیر اعلیٰ بلوچستان کو خصوصی طور پر مدعو کیا جائے گا۔

رپورٹ: محمد خان کاکڑ

35ویں نیشنل گیمز میں بلوچستان کے لیے نمایاں اور شاندار کارکردگی کا مظاہرہ کرنے والے کھلاڑیوں کے اعزاز میں ایک عظیم الشان، پروقار اور یادگار تقریب کا انعقاد کیا جائے گا، جس میں کھلاڑیوں کو ان کی محنت، لگن اور کامیابیوں کے اعتراف میں کیش انعامات سے نوازا جائے گا۔
یہ بات سیکرٹری کھیل حکومت بلوچستان درا بلوچ نے کوئٹہ میں میڈیا سے گفتگو کرتے ہوئے کہی۔ انہوں نے کہا کہ بلوچستان کے کھلاڑیوں نے محدود وسائل کے باوجود 35ویں نیشنل گیمز میں غیر معمولی کارکردگی دکھا کر صوبے کا نام پورے ملک میں روشن کیا، جو نہ صرف قابلِ تحسین ہے بلکہ نوجوان نسل کے لیے ایک حوصلہ افزا مثال بھی ہے۔
سیکرٹری کھیل نے بتایا کہ مجوزہ تقریب جلد منعقد کی جائے گی، جس میں وزیر اعلیٰ بلوچستان میر سرفراز بگٹی کو خصوصی طور پر شرکت کی دعوت دی جائے گی تاکہ وہ خود کھلاڑیوں کی حوصلہ افزائی کر سکیں۔ انہوں نے کہا کہ وزیر اعلیٰ بلوچستان کی قیادت اور ہدایات کی روشنی میں محکمہ کھیل صوبے میں کھیلوں کے فروغ کے لیے سنجیدہ اور عملی اقدامات کر رہا ہے۔
درا بلوچ نے مزید کہا کہ حکومت بلوچستان نوجوانوں کو مثبت سرگرمیوں کی جانب راغب کرنے کے لیے مستقبل میں مزید میگا اسپورٹس ایونٹس، ٹورنامنٹس اور تربیتی پروگرامز کے انعقاد کا ارادہ رکھتی ہے، تاکہ صوبے میں کھیلوں کے معیار کو بہتر بنایا جا سکے اور نئے ٹیلنٹ کو سامنے لایا جا سکے۔
انہوں نے اس امید کا اظہار کیا کہ اگر بلوچستان کے کھلاڑیوں کو مناسب سہولیات اور مواقع فراہم کیے جائیں تو وہ قومی ہی نہیں بلکہ بین الاقوامی سطح پر بھی ملک اور صوبے کا نام روشن کرنے کی بھرپور صلاحیت رکھتے ہیں۔