کوئٹہ میں خواتین کے کاروبار کو فروغ دینے کے لیے دستکاری نمائش

کوئٹہ میں یو این ایچ سی آر کی جانب سے افغان مہاجرین اور مقامی خواتین کی تیار کردہ مصنوعات کی دو روزہ دستکاری نمائش کا انعقاد کیا گیا، جس میں خواتین نے اپنے کاروبار کو فروغ دینے اور نئی مارکیٹوں تک رسائی کے مواقع پر روشنی ڈالی۔

کوئٹہ میں خواتین کے کاروبار کو فروغ دینے اور ان کی دستکاریوں کو اجاگر کرنے کے لیے یو این ایچ سی آر کی جانب سے افغان مہاجرین اور مقامی خواتین کی تیار کردہ مصنوعات کی دو روزہ نمائش کا انعقاد کیا گیا۔ نمائش میں کوئٹہ، قلات اور بلوچستان کے مختلف اضلاع کی خواتین نے شرکت کی اور اپنے کاروباری تجربات و تجاویز سے حاضرین کو مستفید کیا۔

نمائش میں شریک خواتین کا کہنا تھا کہ ایسے اقدامات سے نہ صرف ان کے کاروبار کو فروغ ملتا ہے بلکہ انہیں نئی مارکیٹوں تک رسائی کا موقع بھی ملتا ہے۔ خواتین نے ثقافتی ملبوسات، روایتی دستکاری، کپڑے اور گھریلو مصنوعات کو نمائش میں پیش کیا، جو شرکاء کی توجہ کا مرکز بنیں۔
سیکرٹری برائے اقلیتی امور سید نعمان شاہ نے نمائش کا دورہ کرتے ہوئے کہا کہ بلوچستان کی ثقافت دنیا میں منفرد مقام رکھتی ہے اور اس طرح کی سرگرمیاں خواتین اور افغان مہاجرین کو خود کفیل بننے کے مواقع فراہم کرتی ہیں۔ انہوں نے کہا کہ خواتین کی کاروباری سرگرمیوں کو فروغ دینا وقت کی اہم ضرورت ہے اور اس سے ان کی معاشی بااختیاری میں مدد ملتی ہے۔