رکن بلوچستان اسمبلی ڈاکٹر عبدالمالک بلوچ کا سی پی ایس پی ریجنل سینٹر کوئٹہ کا دورہ

رکن بلوچستان اسمبلی و سابق وزیر اعلیٰ بلوچستان ڈاکٹر عبدالمالک بلوچ نے کالج آف فزیشنز اینڈ سرجنز پاکستان (CPSP) کے ریجنل سینٹر کوئٹہ کا دورہ کیا، جہاں انہوں نے ادارے کی کارکردگی کو سراہا اور سربراہ ریجنل سینٹر پروفیسر ڈاکٹر عائشہ صدیقہ کو قومی و بین الاقوامی اعزازات پر مبارکباد دی۔

رپورٹ: سیدہ نتاشا

رکن بلوچستان اسمبلی اور سابق وزیر اعلیٰ بلوچستان ڈاکٹر عبدالمالک بلوچ نے کالج آف فزیشنز اینڈ سرجنز پاکستان (CPSP) کے ریجنل سینٹر کوئٹہ کا تفصیلی دورہ کیا۔ اس موقع پر ریجنل سینٹر کی سربراہ پروفیسر ڈاکٹر عائشہ صدیقہ نے ادارے کی کارکردگی اور تعلیمی سرگرمیوں پر جامع بریفنگ دی۔
ڈاکٹر عائشہ صدیقہ نے بتایا کہ کالج آف فزیشنز اینڈ سرجنز پاکستان صوبہ بلوچستان میں پوسٹ گریجویٹ طبی تعلیم کے فروغ کو خصوصی اہمیت دے رہا ہے۔ انہوں نے کہا کہ CPSP کے صدر پروفیسر خالد مسعود گوندل، سینئر وائس پریزیڈنٹ پروفیسر محمد شعیب شفیع اور پوری کونسل صوبے کے پوسٹ گریجویٹ ڈاکٹروں کو اعلیٰ معیار کی تعلیم اور تربیت کی فراہمی کے لیے بھرپور معاونت فراہم کر رہی ہے۔

اس موقع پر ڈاکٹر عبدالمالک بلوچ نے CPSP ریجنل سینٹر کی مجموعی کارکردگی کو سراہتے ہوئے پروفیسر ڈاکٹر عائشہ صدیقہ کو ان کی نمایاں قومی اور بین الاقوامی کامیابیوں پر دلی مبارکباد دی۔ انہوں نے کہا کہ صوبہ بلوچستان کی بیٹی پروفیسر ڈاکٹر عائشہ صدیقہ نے ویمن ورلڈ ایوارڈ ایشیا اوشینیا ریجن میں FIGO (انٹرنیشنل فیڈریشن آف آبسٹیٹرکس اینڈ گائناکالوجی) کے بورڈ آف ٹرسٹیز کا اعزاز حاصل کرکے نہ صرف پاکستان بلکہ خصوصاً بلوچستان کا نام روشن کیا ہے۔
ڈاکٹر عبدالمالک بلوچ نے مزید کہا کہ یہ اعزاز دنیا بھر کی صرف 19 منتخب خواتین کو دیا جاتا ہے، جو پروفیسر ڈاکٹر عائشہ صدیقہ کی پیشہ ورانہ صلاحیتوں اور خدمات کا واضح ثبوت ہے۔ انہوں نے امید ظاہر کی کہ CPSP بلوچستان میں طبی تعلیم اور تحقیق کے فروغ میں آئندہ بھی اہم کردار ادا کرتا رہے گا۔