بلوچستان میں 12 ہزار سے زائد بچوں کو دوبارہ تعلیم سے جوڑنے کا فیصلہ

بلوچستان میں یونیسیف اور ناروے کے تعاون سے 12 ہزار سے زائد غیر اسکول جانے والے بچوں کو دوبارہ تعلیمی نظام میں شامل کیا جائے گا۔ اس مقصد کے لیے دور دراز علاقوں میں Accelerated Learning Programme کے مراکز قائم کیے جائیں گے تاکہ بچوں کو تیز رفتار تعلیم فراہم کی جا سکے۔

بلوچستان میں تعلیمی سہولیات سے محروم بچوں کو اسکولوں میں واپس لانے کے لیے ایک اہم پیش رفت کے تحت اس سال 12 ہزار سے زائد بچوں کو دوبارہ تعلیمی نظام کا حصہ بنایا جائے گا۔

یہ اقدام رائل نارویجن ایمبیسی اسلام آباد اور یونیسیف پاکستان کے تعاون سے کیا جا رہا ہے، جس کا مقصد دور دراز اور پسماندہ علاقوں میں تعلیم کے مواقع کو بہتر بنانا ہے۔

پروگرام کے تحت بلوچستان کے مختلف دور دراز علاقوں میں Accelerated Learning Programme (ALP) مراکز قائم کیے جائیں گے جہاں بچوں کو تیز رفتار طریقے سے بنیادی تعلیم مکمل کروائی جائے گی۔

حکام کے مطابق یہ ماڈل ان بچوں کے لیے خاص طور پر مؤثر ہے جو مختلف وجوہات کی بنا پر تعلیم سے محروم رہ گئے ہیں، جبکہ یہ مراکز مقامی سطح پر قائم ہونے کی وجہ سے بچوں کو طویل اور غیر محفوظ سفر سے بھی بچائیں گے۔

اس تعلیمی منصوبے کے تحت ہزاروں بچوں کو دوبارہ اسکول سے جوڑ کر ان کے بہتر مستقبل کی راہ ہموار کی جائے گی۔