بلوچستان میں صحت کے شعبے میں خاموش مگر مؤثر انقلاب

وزیر اعلیٰ بلوچستان میر سرفراز بگٹی کا کہنا ہے کہ صوبے میں محکمہ صحت کے شعبے میں نمایاں بہتری لائی گئی ہے۔ کنٹریکٹ بنیادوں پر تقریباً 3000 ڈاکٹرز کی بھرتی اور 164 بیسک ہیلتھ یونٹس کو فعال کر کے دور دراز علاقوں کے عوام کو بنیادی طبی سہولیات ان کی دہلیز پر فراہم کی جا رہی ہیں۔ حکومت صحت کے شعبے کے دائرہ کار کو مزید وسعت دینے کے لیے پُرعزم ہے۔

رپورٹ: سیدہ نتاشا

وزیر اعلیٰ بلوچستان میر سرفراز بگٹی نے کہا ہے کہ صوبے میں گزشتہ کچھ عرصے کے دوران محکمہ صحت میں خاموش مگر مؤثر انقلاب برپا کیا گیا ہے، جس کے مثبت اثرات براہِ راست عوام تک پہنچ رہے ہیں۔
وزیر اعلیٰ کے مطابق کنٹریکٹ بنیادوں پر تقریباً 3000 ڈاکٹرز کی بھرتی عمل میں لائی گئی ہے، جس کے نتیجے میں صوبے بھر میں 164 بیسک ہیلتھ یونٹس کو فعال کر دیا گیا ہے۔ ان اقدامات سے دور دراز اور پسماندہ علاقوں کے عوام کو اب ان کے قریب بنیادی صحت کی سہولیات میسر آ رہی ہیں۔میر سرفراز بگٹی نے کہا کہ حکومت کی اولین ترجیح عوام کو معیاری اور بروقت طبی سہولیات کی فراہمی ہے، خصوصاً ایسے علاقے جو طویل عرصے سے صحت کی بنیادی سہولیات سے محروم رہے ہیں۔
وزیر اعلیٰ بلوچستان نے مزید کہا کہ محکمہ صحت کی سہولیات کے دائرہ کار کو مستقبل میں مزید وسیع کیا جائے گا تاکہ صوبے کے ہر شہری کو صحت کی بہتر سہولیات فراہم کی جا سکیں۔