جامعہ بلوچستان کی آئی ایم ایس کی طالبہ فرشتہ علی نے نیشنل گیمز میں گولڈ میڈل جیت لیا

رپورٹ: سیدہ نتاشا
جامعہ بلوچستان کے شعبہ انسٹیٹیوٹ آف مینجمنٹ سائنسز (آئی ایم ایس) کی چھٹے سمسٹر کی طالبہ فرشتہ علی دختر غلام علی نے 35ویں نیشنل گیمز، کراچی میں شاندار کارکردگی کا مظاہرہ کرتے ہوئے گولڈ میڈل اپنے نام کر لیا۔ نیشنل گیمز کا انعقاد 7 سے 13 دسمبر 2025 تک کراچی میں ہوا، جس میں ملک بھر سے کھلاڑیوں نے شرکت کی۔
فرشتہ علی کی اس کامیابی پر جامعہ بلوچستان، انسٹیٹیوٹ آف مینجمنٹ سائنسز اور صوبہ بلوچستان میں خوشی کی لہر دوڑ گئی ہے۔ جامعہ انتظامیہ اور آئی ایم ایس کی جانب سے فرشتہ علی کو اس شاندار کامیابی پر دلی مبارکباد پیش کی گئی اور اس امید کا اظہار کیا گیا کہ وہ آئندہ بھی قومی اور بین الاقوامی سطح پر ملک و صوبے کا نام روشن کرتی رہیں گی۔
جامعہ بلوچستان کے شعبہ تعلقات عامہ کے مطابق فرشتہ علی کی کامیابی نوجوان طلبہ و طالبات کے لیے ایک مثالی مثال ہے اور اس سے صوبے میں کھیلوں کے فروغ کی حوصلہ افزائی ہوگی۔