کوئٹہ میں 7 محرم کا مرکزی جلوس پُرامن طور پر اختتام پذیر، سخت سیکیورٹی انتظامات نافذ

کوئٹہ میں 7 محرم الحرام کا مرکزی علم، تعزیہ اور ذوالجناح کا جلوس امام بارگاہ کلان ہزارہ سے برآمد ہو کر اپنے مقررہ راستوں سے گزرتا ہوا امام بارگاہ ناصر العزا میں اختتام پذیر ہوا۔ جلوس کے دوران سخت سیکیورٹی انتظامات کیے گئے، موبائل فون سروس معطل رہی جبکہ دفعہ 144 کے تحت ڈبل سواری پر پابندی نافذ رہی۔

کوئٹہ: کوئٹہ میں 7 محرم الحرام کا مرکزی علم، تعزیہ اور ذوالجناح کا جلوس سخت سیکیورٹی انتظامات کے درمیان اپنے مقررہ راستوں سے ہوتا ہوا پُرامن طور پر امام بارگاہ ناصر العزا میں اختتام پذیر ہوگیا۔جلوس امام بارگاہ کلان ہزارہ سے برآمد ہوا اور پرنس روڈ، آرٹ اسکول روڈ، آرچر روڈ، لیاقت بازار، جنکشن چوک اور میکنگی روڈ سے گزرتا ہوا اپنی منزل پر پہنچا۔ عزاداروں نے نوحہ خوانی اور سینہ زنی کے ذریعے شہدائے کربلا کو خراجِ عقیدت پیش کیا۔جلوس کے راستوں پر سبیلوں کا اہتمام کیا گیا جہاں عزاداروں میں پانی، شربت، جوس اور لسی تقسیم کی گئی۔جلوس کے دوران سیکیورٹی کے سخت انتظامات کیے گئے۔ جلوس کے راستوں کو ٹریفک کے لیے بند رکھا گیا، تجارتی مراکز اور دکانیں بند رہیں جبکہ سیکیورٹی کی نگرانی کے لیے سی سی ٹی وی کیمروں سے مسلسل مانیٹرنگ کی گئی۔ شہر میں موبائل فون سروس عارضی طور پر معطل رہی اور دفعہ 144 کے تحت ڈبل سواری پر پابندی نافذ رہی۔پولیس اور دیگر قانون نافذ کرنے والے اداروں نے جلوس کے دوران امن و امان برقرار رکھا اور جلوس کسی ناخوشگوار واقعے کے بغیر اختتام پذیر ہوگیا۔