خضدار میں پولیس تنصیبات پر حملے ناکام، جوابی کارروائی میں حملہ آور پسپا، دو شہری جاں بحق

خضدار کے علاقوں نال اور گریشہ میں مسلح افراد نے پولیس تنصیبات کو نشانہ بنانے کی کوشش کی، تاہم پولیس اور اے ٹی ایف کی بروقت کارروائی سے حملہ ناکام بنا دیا گیا۔ فائرنگ اور دھماکوں کے نتیجے میں ایک مرد اور ایک خاتون جاں بحق جبکہ متعدد شہری زخمی ہوئے، سیکیورٹی مزید سخت کر دی گئی ہے۔

رپورٹ : نتاشا
خضدار کے علاقوں نال اور گریشہ میں مسلح افراد کی جانب سے پولیس تنصیبات کو نشانہ بنانے کی کوشش کی گئی، تاہم پولیس اور اے ٹی ایف کی بروقت جوابی کارروائی کے باعث حملہ آور پسپا ہو گئے۔حملے کے دوران فائرنگ اور دھماکوں کے نتیجے میں متعدد شہری زخمی ہوئے جبکہ ایک مرد اور ایک خاتون جاں بحق ہوئے۔ زخمیوں کو فوری طور پر ڈی ایچ کیو اسپتال خضدار منتقل کیا گیا۔
نال پولیس اسٹیشن اور گریشہ تھانے پر حملوں کے باوجود پولیس اہلکاروں نے مؤثر مزاحمت کرتے ہوئے تنصیبات کا دفاع کیا اور حملہ آوروں کو اندر داخل ہونے سے روک دیا۔
واقعے کے دوران بعض نجی املاک کو بھی نقصان پہنچا۔ اطلاع ملتے ہی ایس ایس پی خضدار پولیس اور اے ٹی ایف کی اضافی نفری کے ہمراہ موقع پر پہنچ گئے۔
حکام کے مطابق صورتحال قابو میں ہے جبکہ علاقے میں سیکیورٹی اقدامات مزید سخت کر دیے گئے ہیں۔