بلوچستان کابینہ کا الیکٹرک بائیکس اسکیم اور سرکاری ملازمین کے لیے ہیلتھ انشورنس متعارف کرانے کا فیصلہ

وزیر اعلیٰ بلوچستان میر سرفراز بگٹی کی زیر صدارت صوبائی کابینہ کے 21ویں اجلاس میں عام آدمی کے لیے الیکٹرک بائیکس اسکیم، سرکاری ملازمین کے لیے ہیلتھ انشورنس، میرٹ پر تعیناتیوں اور انٹرپرائزز ڈویلپمنٹ پروگرام کی توسیع سمیت اہم فیصلے کیے گئے، جبکہ وزیراعظم کی جانب سے مواصلاتی اور تعلیمی منصوبوں کے آغاز پر اظہارِ تشکر بھی کیا گیا۔

رپورٹ: سیدہ نتاشا

وزیر اعلیٰ بلوچستان میر سرفراز بگٹی کی زیر صدارت صوبائی کابینہ کا 21واں اہم اجلاس منعقد ہوا، جس میں صوبے کی سماجی و معاشی ترقی سے متعلق متعدد اہم فیصلوں کی منظوری دی گئی۔ اجلاس میں وزیراعظم پاکستان کی جانب سے بلوچستان میں مواصلاتی اور تعلیمی منصوبوں کے آغاز پر صوبائی کابینہ نے اظہارِ تشکر کیا۔
کابینہ نے عام آدمی کے لیے الیکٹرک بائیکس اسکیم متعارف کرانے کا فیصلہ کیا، جس کے تحت طلباء، ورکنگ ویمن اور سرکاری ملازمین کو 30 فیصد سبسڈی فراہم کی جائے گی، جبکہ عام شہریوں کو بھی آسان اقساط پر الیکٹرک بائیکس دی جائیں گی۔ یہ اسکیم بینک فنانسنگ کے تحت نافذ کی جائے گی۔

اجلاس میں انکشاف کیا گیا کہ صوبے کے لگ بھگ ڈھائی لاکھ سرکاری ملازمین کے علاج معالجے پر سالانہ 6 سے 7 ارب روپے خرچ ہو رہے ہیں، جس کے پیش نظر کابینہ نے سرکاری ملازمین کے لیے جامع ہیلتھ انشورنس اسکیم متعارف کرانے کا فیصلہ کیا۔ اس کے علاوہ پیشگی میڈیکل ادائیگیوں اور عوامی انڈومنٹ فنڈ کے آڈٹ کی بھی منظوری دی گئی۔
صوبائی کابینہ نے انٹرپرائزز ڈویلپمنٹ پروگرام کی گوادر، کیچ اور آواران تک توسیع کی منظوری دیتے ہوئے نوجوانوں کے لیے معاشی مواقع بڑھانے کے عزم کا اظہار کیا۔ اجلاس میں میرٹوکریسی کے فروغ کے لیے میرٹ پر تعیناتیوں پر اتفاق کیا گیا۔
وزیر اعلیٰ میر سرفراز بگٹی نے اجلاس سے خطاب کرتے ہوئے کہا کہ عام آدمی کے ٹیکس سے حاصل ہونے والے وسائل عوام کی امانت ہیں اور انہیں منصفانہ طریقے سے استعمال کیا جانا چاہیے۔ انہوں نے کہا کہ بلوچستان کے غریب عوام کو مشکلات میں ڈال کر وسائل کا بڑا حصہ مخصوص طبقے پر خرچ کرنا ناانصافی ہے۔ وزیر اعلیٰ نے اس عزم کا اعادہ کیا کہ گڈ گورننس کا قیام میرٹوکریسی سے مشروط ہے اور کابینہ اس پر مکمل عملدرآمد یقینی بنائے گی۔