وزیر اعلیٰ بلوچستان نے کان کنی کے شعبے کو صنعت کا درجہ دینے کو اقتصادی ترقی کی کنجی قرار دیا

رپورٹ: سیدہ نتاشا
وزیر اعلیٰ بلوچستان میر سرفراز بگٹی نے مائنز اونرز ایسوسی ایشن کے نمائندہ وفد سے ملاقات کی اور کان کنی کے شعبے کو صنعتی حیثیت دینے کے فیصلے کو تاریخی قرار دیا۔ انہوں نے کہا کہ اس سے معیشت مستحکم ہوگی، روزگار کے مواقع بڑھیں گے اور معدنی وسائل کا بہتر استعمال ممکن ہوگا۔
وزیر اعلیٰ نے مزدوروں کی فلاح، حفاظتی انتظامات، صحت و سلامتی کے معیار اور جدید ٹیکنالوجی کے استعمال پر زور دیا۔ غیر قانونی کان کنی روکنے اور معدنیات کے تحفظ کے لیے جامع حکمت عملی بھی تیار کی جا رہی ہے۔
وفد نے چمالنگ اور دکی میں ریسکیو سینٹرز قائم کرنے اور شعبے میں اصلاحات پر حکومت کے اقدامات کو سراہا اور کہا کہ یہ پالیسیاں سرمایہ کار اعتماد اور سیکٹر کے استحکام کے لیے وقت کی ضرورت ہیں۔
ملاقات میں صوبائی وزیر میر شعیب نوشیروانی، رکن اسمبلی پرنس آغا عمر احمد زئی، سیکرٹری مائنز، ڈی جی مائنز اور دیگر حکام بھی موجود تھے۔