بلوچستان پولیس کے شہداء پیکج میں نمایاں اضافہ

انسپکٹر جنرل آف پولیس بلوچستان محمد طاہر نے بلوچستان پولیس کے شہداء پیکج میں نمایاں اضافے کا اعلان کیا ہے۔ اس فیصلے کے تحت شہداء کے لواحقین، دورانِ ڈیوٹی زخمی اہلکاروں، پولیس ملازمین کی شادی اور فوت ہونے والے اہلکاروں کی بیواؤں کے لیے مالی معاونت میں خاطر خواہ اضافہ کر دیا گیا ہے۔ آئی جی پولیس کے مطابق شہداء اور ان کے اہل خانہ پولیس فورس پر حق رکھتے ہیں۔

رپورٹ: سیدہ نتاشا

بلوچستان پولیس کے شہداء پیکج کے تحت دی جانے والی مالی معاونت میں نمایاں اضافہ کر دیا گیا ہے۔ انسپکٹر جنرل آف پولیس بلوچستان محمد طاہر نے اعلان کیا کہ شہداء کے خاندانوں کو دی جانے والی مالی امداد ایک لاکھ روپے سے بڑھا کر دو لاکھ روپے کر دی گئی ہے۔
آئی جی پولیس کے مطابق دورانِ ڈیوٹی شدید زخمی ہونے والے پولیس اہلکاروں کو اب دس ہزار کے بجائے ایک لاکھ روپے جبکہ معمولی زخمی اہلکاروں کو پانچ ہزار کے بجائے پچیس ہزار روپے دیئے جائیں گے۔ شہداء کی تدفین کے لیے دی جانے والی رقم کو چالیس ہزار سے بڑھا کر پچہتر ہزار روپے کر دیا گیا ہے، جبکہ صوبے سے باہر میت لے جانے پر مالی معاونت پچاس ہزار کے بجائے ایک لاکھ روپے مقرر کی گئی ہے۔

انہوں نے مزید بتایا کہ پولیس ملازمین کی شادی کے لیے دی جانے والی مالی امداد بارہ ہزار پانچ سو سے بڑھا کر پچاس ہزار روپے کر دی گئی ہے، جبکہ شہداء اور فوت ہونے والے اہلکاروں کی بیٹیوں کی شادی کے لیے امدادی رقم پچاس ہزار سے بڑھا کر دو لاکھ روپے مقرر کر دی گئی ہے۔
آئی جی پولیس کے مطابق گریڈ 1 سے 11 تک فوت ہونے والے ملازمین کی بیواؤں کو ماہانہ مالی معاونت بارہ ہزار روپے، گریڈ 12 سے 15 تک چودہ ہزار روپے، گریڈ 16 سے 17 تک سولہ ہزار روپے جبکہ گریڈ 18 تک کے فوت ہونے والے ملازمین کی بیواؤں کو بیس ہزار روپے دیئے جائیں گے۔
محمد طاہر کا کہنا تھا کہ شہداء، ریٹائرڈ ملازمین اور ان کے بچوں کا پولیس فورس پر حق ہے، اور شہداء کی قربانیاں ہمارے لیے مشعلِ راہ ہیں۔ انہوں نے کہا کہ شہداء ہمارے ماتھے کا جھومر ہیں اور ان کی خدمات کو ہمیشہ یاد رکھا جائے گا۔