محرم الحرام کے دوران سخت سیکیورٹی اقدامات کا فیصلہ، صوبہ بھر میں خصوصی پلان نافذ ہوگا

بلوچستان میں محرم الحرام کے دوران امن و امان برقرار رکھنے کے لیے سخت سیکیورٹی اقدامات کا فیصلہ کیا گیا ہے۔ جلوسوں، مجالس اور حساس مقامات کی حفاظت کے لیے پولیس، فورسز اور جدید نگرانی کے نظام کو متحرک کر دیا گیا ہے۔

کوئٹہ: انسپکٹر جنرل پولیس بلوچستان محمد طاہر نے کہا ہے کہ محرم الحرام کے دوران امن و امان کے قیام کو یقینی بنانے کے لیے صوبہ بھر میں جامع سیکیورٹی انتظامات کیے جائیں گے، جبکہ یوم عاشور کے جلوسوں اور مجالس کی حفاظت کے لیے خصوصی اقدامات نافذ ہوں گے۔

سنٹرل پولیس آفس کوئٹہ میں ویڈیو لنک کے ذریعے منعقدہ اجلاس سے خطاب کرتے ہوئے آئی جی پولیس نے کہا کہ محرم الحرام اتحاد، برداشت اور بھائی چارے کا درس دیتا ہے، لہٰذا اس مقدس مہینے میں امن و سلامتی کا قیام قانون نافذ کرنے والے اداروں کی اولین ترجیح ہے۔

انہوں نے بتایا کہ صوبے کے تمام اضلاع کے لیے سیکیورٹی حکمت عملی مرتب کر لی گئی ہے، جس کے تحت بڑے شہروں کے داخلی اور خارجی راستوں پر نگرانی مزید سخت کی جائے گی جبکہ جلوسوں کے دوران ٹریفک کی روانی برقرار رکھنے کے لیے خصوصی انتظامات کیے جائیں گے۔

آئی جی پولیس کے مطابق جلوسوں کے راستوں کی پیشگی تلاشی اور کلیئرنس کا عمل مکمل کیا جائے گا، جبکہ ضرورت پڑنے پر راستوں سے ملحقہ بازاروں اور تجارتی مراکز کی نگرانی بڑھائی جائے گی۔ حساس ایام میں موٹر سائیکل کی ڈبل سواری پر پابندی اور دفعہ 144 کے نفاذ پر بھی سختی سے عمل درآمد کرایا جائے گا۔

آئی جی پولیس نے مزید بتایا کہ غیر قانونی، مشکوک اور غیر رجسٹرڈ گاڑیوں کے خلاف کارروائیوں میں بھی تیزی لائی جائے گی۔ سیکیورٹی پلان کے تحت صوبے بھر میں 77 مجالس، 77 امام بارگاہوں، 41 چیک پوسٹس اور 21 عارضی سیکیورٹی مراکز کے لیے خصوصی انتظامات کیے گئے ہیں۔

انہوں نے کہا کہ محکمہ داخلہ، آئی جی پولیس آفس اور مختلف ڈی آئی جی دفاتر میں کنٹرول روم قائم کیے گئے ہیں تاکہ سیکیورٹی صورتحال کی مسلسل نگرانی کی جا سکے اور محرم الحرام کے دوران امن و امان کی صورتحال برقرار رکھی جا سکے