پولیس شہداء کے معاوضوں میں اضافے کی تجویز، وزیراعلیٰ بلوچستان نے منظوری کے لیے سمری طلب کر لی

وزیراعلیٰ بلوچستان نے پولیس شہداء کے نقد معاوضے اور پلاٹ یا اراضی کے بدلے نقد ادائیگی کی شرحوں میں اضافے کی تجویز پر منظوری کے لیے سمری طلب کر لی۔ مجوزہ نظرثانی کے تحت نقد معاوضہ ایک کروڑ سے بڑھا کر ایک کروڑ پچیس لاکھ روپے جبکہ بعض اہلکاروں کے لیے پلاٹ کے بدلے نقد ادائیگی 11 لاکھ سے بڑھا کر 25 لاکھ روپے کرنے کی تجویز دی گئی ہے۔

کوئٹہ: وزیراعلیٰ بلوچستان میر سرفراز بگٹی نے پولیس شہداء کے اہل خانہ کے لیے نقد معاوضے اور پلاٹ یا اراضی کے بدلے نقد ادائیگی کی شرحوں میں اضافے کی تجویز پر منظوری کے لیے سمری طلب کر لی ہے۔

وزیراعلیٰ بلوچستان کے پرنسپل سیکریٹری عمران زرکون کی جانب سے جاری مراسلے کے مطابق وزیراعلیٰ نے متعلقہ محکموں کو ہدایت کی ہے کہ نظرثانی شدہ شرحوں پر مبنی سمری ان کی منظوری کے لیے پیش کی جائے۔

مجوزہ نظرثانی کے تحت کانسٹیبل، ہیڈ کانسٹیبل، اسسٹنٹ سب انسپکٹر (اے ایس آئی)، سب انسپکٹر اور انسپکٹر سمیت بی-1 سے بی-16 تک کے پولیس شہداء کے لواحقین کے لیے نقد معاوضہ ایک کروڑ روپے سے بڑھا کر ایک کروڑ پچیس لاکھ روپے کرنے کی تجویز دی گئی ہے۔

اسی طرح بی-1 سے بی-8 تک کے کانسٹیبل اور ہیڈ کانسٹیبل کے لیے پلاٹ یا اراضی کے بدلے نقد ادائیگی کی رقم 11 لاکھ روپے سے بڑھا کر 25 لاکھ روپے کرنے کی تجویز بھی سمری میں شامل کی جائے گی۔

مراسلہ ایڈیشنل چیف سیکریٹری داخلہ اور سیکریٹری خزانہ کو ارسال کیا گیا ہے تاکہ مجوزہ نظرثانی کے مطابق سمری تیار کرکے وزیراعلیٰ بلوچستان کو منظوری کے لیے پیش کی جا سکے۔

مجوزہ اقدام کا مقصد دہشت گردی اور امن و امان کے قیام کے دوران جانوں کا نذرانہ پیش کرنے والے پولیس شہداء کے اہل خانہ کے لیے مالی معاونت میں مزید بہتری لانا ہے۔