کوئٹہ میں منشیات اسمگلنگ کے خلاف بڑی کارروائی، 5.8 ارب روپے مالیت کی منشیات برآمد

سیکیورٹی فورسز نے قلعہ عبداللہ کے علاقے نورک سلیمان خیل میں مشترکہ کارروائی کے دوران منشیات پروسیسنگ فیکٹری کا سراغ لگا کر 73 کلوگرام آئس اور 345 کلوگرام خام مال برآمد کر لیا، جس کی مجموعی مالیت 5.8 ارب روپے بتائی جا رہی ہے۔

رپورٹ: سیدہ نتاشا

کوئٹہ میں منشیات اسمگلنگ کے خلاف سیکیورٹی فورسز نے ایک بڑی اور کامیاب کارروائی کرتے ہوئے قلعہ عبداللہ کے علاقے نورک سلیمان خیل میں قائم منشیات پروسیسنگ فیکٹری سے بھاری مقدار میں منشیات برآمد کر لی۔ کارروائی کوئٹہ ڈرگ انفورسمنٹ فورس، ایف سی نارتھ بلوچستان، خفیہ اداروں اور مقامی پولیس نے مشترکہ طور پر انجام دی۔

ذرائع کے مطابق کارروائی کے دوران 73 کلوگرام آئس جبکہ 345 کلوگرام منشیات کا خام مال قبضے میں لیا گیا۔ برآمد ہونے والے منشیات اور خام مال کی مجموعی مالیت 5.8 ارب روپے بتائی جا رہی ہے۔
سیکیورٹی اداروں کا کہنا ہے کہ یہ کارروائی منشیات اسمگلنگ کے نیٹ ورک کے خلاف ایک بڑی کامیابی ہے اور ایسے عناصر کے خلاف کارروائیاں مستقبل میں بھی جاری رہیں گی تاکہ معاشرے کو منشیات کے ناسور سے پاک کیا جا سکے۔