بلوچستان میں تجاوزات کے خلاف تین ہزار سے زائد آپریشنز، بلاامتیاز کارروائیاں جاری ہیں، وزیر اعلیٰ میر سرفراز بگٹی

وزیر اعلیٰ بلوچستان میر سرفراز بگٹی کا کہنا ہے کہ صوبے بھر میں تجاوزات کے خلاف بھرپور اور بلاامتیاز کارروائیاں جاری ہیں، جن کے دوران تین ہزار سے زائد آپریشنز اور 800 سے زیادہ غیرقانونی پٹرول پمپس سیل کیے جا چکے ہیں۔ سرکاری زمین پر کسی قسم کا قبضہ برداشت نہیں کیا جائے گا۔

رپورٹ: سیدہ نتاشا

وزیر اعلیٰ بلوچستان میر سرفراز بگٹی نے کہا ہے کہ بلوچستان میں گزشتہ چند ماہ کے دوران تجاوزات کے خلاف تین ہزار سے زائد آپریشنز کیے جا چکے ہیں، جن کا مقصد سرکاری زمین کو غیرقانونی قبضوں سے واگزار کرانا ہے۔
انہوں نے بتایا کہ اب تک 800 سے زائد غیرقانونی پٹرول پمپس سیل کیے جا چکے ہیں، جبکہ تجاوزات کے خلاف بلاامتیاز کارروائیاں مسلسل جاری ہیں۔ وزیر اعلیٰ کے مطابق کوئٹہ شہر میں سرکاری زمین پر قائم دس سال پرانا، ایک ارب روپے سے زائد مالیت کا غیرقانونی پٹرول پمپ گزشتہ روز مسمار کر دیا گیا۔

میر سرفراز بگٹی کا کہنا تھا کہ سرکاری زمین بلوچستان کے عوام کی امانت ہے، جس پر کسی قسم کا غیرقانونی قبضہ برداشت نہیں کیا جائے گا۔ انہوں نے واضح کیا کہ تجاوزات کے خلاف کارروائیوں میں کسی بھی قسم کے سیاسی دباؤ کو خاطر میں نہیں لایا جائے گا اور قانون کی عملداری ہر صورت یقینی بنائی جائے گی۔