کوئٹہ: مبینہ ہراسانی کے باعث افسوسناک سانحہ، پانچ افراد جاں بحق، دو سرکاری افسران معطل

کوئٹہ کے علاقے وحدت کالونی میں مبینہ ہراسانی کے باعث افسوسناک واقعے میں ایک شخص نے بیوی اور چار بچوں کو قتل کرنے کے بعد خودکشی کرلی۔ واقعے کے بعد دو سرکاری افسران معطل کر دیے گئے جبکہ تحقیقات جاری ہیں۔

کوئٹہ کے علاقے وحدت کالونی میں ایک دل دہلا دینے والے واقعے میں ایک شخص نے مبینہ طور پر اپنی بیوی اور چار بچوں کو قتل کرنے کے بعد خودکشی کرلی، جس کے نتیجے میں پانچ افراد جاں بحق ہوگئے۔

پولیس نے واقعے کا مقدمہ (ایف آئی آر) شہید امیر محمد دستی تھانے میں مقتول محمد آصف کے بھائی ظریف خان گورگیج کی مدعیت میں درج کیا ہے۔ ایف آئی آر میں الزام ہے کہ محمد آصف کو مسلسل ہراسانی، بلیک میلنگ اور ذہنی دباؤ کا سامنا تھا۔

مقدمے میں S&GAD کے انڈر سیکرٹری آفتاب احمد جوبل، ان کی اہلیہ، ماسود احمد مینگل، ڈرائیور مسعود احمد اور سمال انڈسٹریز کے ڈائریکٹر اقبال کو نامزد کیا گیا ہے۔

واقعے کے بعد بلوچستان حکومت نے فوری کارروائی کرتے ہوئے انڈر سیکرٹری آفتاب احمد جوبل (BPS-18) اور ڈرائیور ماسود احمد (BPS-05) کو معطل کردیا، جبکہ ماسود احمد کو گرفتار بھی کرلیا گیا۔ وزیراعلیٰ بلوچستان نے شفاف تحقیقات کا حکم دیا ہے۔

حکام کے مطابق متاثرہ شخص نے مبینہ طور پر اپنی موت سے قبل ایک بیان بھی ریکارڈ کروایا تھا، جس میں ہراسانی کے الزامات شامل تھے۔ تحقیقات جاری ہیں جبکہ حکومت نے واقعے کی مکمل رپورٹ طلب کرلی ہے۔