وزیر اعلیٰ بلوچستان سے یو این ایف پی اے کنٹری ریپریزنٹیٹو کی ملاقات، آبادی اور صحت سے متعلق پالیسیوں پر تبادلہ خیال

رپورٹ: سیدہ نتاشا

وزیر اعلیٰ بلوچستان میر سرفراز بگٹی سے اقوام متحدہ کے ادارہ برائے آبادی (یو این ایف پی اے) کے کنٹری ریپریزنٹیٹو لوائے شبانیہ نے ملاقات کی۔ ملاقات میں پارلیمانی سیکرٹری پاپولیشن آغا عمر خان احمدزئی اور چیف سیکرٹری بلوچستان شکیل قادر خان بھی شریک تھے۔

ملاقات کے دوران بلوچستان میں آبادی کے چیلنجز، ماں اور بچے کی صحت، نوجوانوں کی فلاح و بہبود اور ڈیٹا پر مبنی پالیسی سازی پر تفصیلی تبادلہ خیال کیا گیا۔ اس موقع پر صوبے میں آبادی سے متعلق مؤثر، مربوط اور پائیدار حکمت عملی کے لیے صوبائی سطح پر ٹاسک فورس کے قیام پر اتفاق کیا گیا۔
وزیر اعلیٰ بلوچستان میر سرفراز بگٹی نے کہا کہ تعلیم اور صحت صوبائی حکومت کی اولین ترجیحات میں شامل ہیں، جبکہ آبادی سے متعلق فیصلے مستند ڈیٹا اور شواہد کی بنیاد پر کیے جائیں گے۔ انہوں نے اس بات پر زور دیا کہ ایڈوکیسی اور ڈیٹا گورننس فریم ورک کے ذریعے پالیسی سازی کو جدید خطوط پر استوار کیا جائے گا۔
وزیر اعلیٰ نے کہا کہ ماں اور بچے کی صحت کے اشاریوں میں بہتری کے لیے ادارہ جاتی اصلاحات ناگزیر ہیں، جبکہ نوجوانوں اور خواتین کی فلاح و بہبود صوبے کی پائیدار ترقی کے لیے کلیدی حیثیت رکھتی ہے۔
اس موقع پر یو این ایف پی اے کے کنٹری ریپریزنٹیٹو لوائے شبانیہ نے بلوچستان میں آبادی، صحت اور انسانی ترقی سے متعلق منصوبوں میں تعاون مزید مضبوط بنانے کے عزم کا اظہار کیا۔