خواتین کو بااختیار بنانے اور عوام دوست پولیسنگ کی جانب اہم قدم، نصیر آباد رینج میں خواتین پولیس اہلکاروں کی کلیدی عہدوں پر تعیناتی

وزیر اعلیٰ بلوچستان میر سرفراز بگٹی نے کہا ہے کہ صوبے میں خواتین کو بااختیار بنانے اور پولیس نظام کو عوام دوست بنانے کے لیے نصیر آباد رینج کے تمام اضلاع میں خواتین پولیس اہلکاروں کو اہم اور ذمہ دارانہ عہدوں پر تعینات کر دیا گیا ہے۔ ان تعیناتیوں سے گھریلو تشدد اور دیگر عوامی شکایات کے فوری ازالے میں بہتری آئی ہے اور عوام کا پولیس پر اعتماد بڑھ رہا ہے۔

رپورٹ: سیدہ نتاشا

وزیر اعلیٰ بلوچستان میر سرفراز بگٹی نے کہا ہے کہ بلوچستان میں خواتین کو بااختیار بنانے اور پولیس نظام کو عوام دوست بنانے کی جانب ایک اور عملی اور مؤثر پیش رفت کی گئی ہے۔ اس اقدام کے تحت نصیر آباد رینج کے تمام اضلاع میں خواتین پولیس اہلکاروں کو مختلف اہم اور ذمہ دارانہ عہدوں پر تعینات کر دیا گیا ہے۔

وزیر اعلیٰ کے مطابق خواتین پولیس اہلکار اب مختلف تھانوں میں کمپلینٹ آفیسر، نائب محرر، کمپیوٹر آپریٹر اور دیگر انتظامی و فیصلہ ساز ذمہ داریاں انجام دے رہی ہیں۔ ان تعیناتیوں کے نتیجے میں خواتین اہلکاروں نے گھریلو تشدد، خواتین اور عام شہریوں کو درپیش مسائل کی شنوائی اور ان کے فوری حل کے لیے فعال کردار ادا کرنا شروع کر دیا ہے، جس سے عوامی اعتماد میں نمایاں اضافہ دیکھنے میں آ رہا ہے۔
میر سرفراز بگٹی نے اس اقدام پر آئی جی پولیس بلوچستان اور ڈی آئی جی نصیر آباد رینج کو خراجِ تحسین پیش کرتے ہوئے کہا کہ خواتین پولیس اہلکاروں کی صلاحیتوں سے بھرپور استفادہ بہتر پولیسنگ، مؤثر سروس ڈیلیوری اور عوامی سہولیات میں بہتری کا باعث بنے گا۔ انہوں نے کہا کہ ان اصلاحات کے ذریعے پولیس اسٹیشنز میں خواتین سمیت تمام سائلین کے لیے ایک محفوظ، باوقار اور اعتماد پر مبنی ماحول فراہم کیا جا رہا ہے تاکہ عوام بلا خوف و جھجک اپنی شکایات درج کرا سکیں۔
وزیر اعلیٰ بلوچستان نے کہا کہ ان اقدامات سے نہ صرف پولیس نظام مزید مضبوط ہوگا بلکہ خواتین کا قانون نافذ کرنے والے اداروں پر اعتماد بھی بڑھے گا، جو ایک مہذب اور منصفانہ معاشرے کے قیام کے لیے ناگزیر ہے۔ انہوں نے اس عزم کا اعادہ کیا کہ صوبائی حکومت بلوچستان میں خواتین کو ہر شعبے میں مساوی مواقع فراہم کرنے کے لیے مستقبل میں بھی عملی اقدامات کا سلسلہ جاری رکھے گی۔