کو ئٹہ میں عالمی یومِ خصوصی افراد کے لیے ’کومک پروگرام‘ کا آغاز

کوئٹہ میں عالمی یومِ خصوصی افراد کے موقع پر محکمہ سوشل ویلفیئر کے زیراہتمام خصوصی تقریب منعقد ہوئی۔ تقریب میں سیکرٹری سوشل ویلفیئر عصمت اللہ قریش اور پارلیمانی سیکرٹری ولی محمد نورزئی نے شرکت کی۔ حکومت بلوچستان نے خصوصی افراد کے لیے ’’کومک پروگرام‘‘ کا باضابطہ آغاز کر دیا، جس کے تحت تعلیمی اسکالرشپس، بلاسود قرضے، مالی معاونت، ماہانہ وظیفے اور روزگار کے مواقع فراہم کیے جائیں گے۔ حکام کا کہنا تھا کہ خصوصی افراد معذور نہیں بلکہ معاشرے کا قابل فخر اور باصلاحیت سرمایہ ہیں۔

رپورٹ: سیدہ نتاشا

کوئٹہ: عالمی یومِ معذوراں کے موقع پر محکمہ سوشل ویلفیئر کے زیراہتمام ایک خصوصی اور پروقار تقریب کا انعقاد کیا گیا، جس میں سرکاری حکام، سول سوسائٹی، نجی اداروں کے نمائندوں اور خصوصی افراد کی بڑی تعداد نے شرکت کی۔ تقریب میں پارلیمانی سیکرٹری برائے سوشل ویلفیئر ولی محمد نورزئی اور سیکرٹری سوشل ویلفیئر عصمت اللہ قریش نے خصوصی شرکت کی۔

سیکرٹری سوشل ویلفیئر عصمت اللہ قریش نے اپنے خطاب میں بتایا کہ بلوچستان میں معذور افراد کی تعداد تین لاکھ تک پہنچ چکی ہے، اور حکومت خصوصی افراد کی کفالت کو اپنی اولین ترجیحات میں شامل رکھے ہوئے ہے۔ انہوں نے اعلان کیا کہ حکومتِ بلوچستان خصوصی افراد کے لیے ’’کومک پروگرام‘‘ کا باضابطہ آغاز کر رہی ہے، جس کے تحت:

خصوصی افراد کی پی ایچ ڈی تک تعلیم کے تمام اخراجات حکومت برداشت کرے گی
باعزت روزگار کے لیے پانچ لاکھ روپے تک بلاسود قرض فراہم کیا جائے گا
شادی کے لیے دو لاکھ روپے کی مالی معاونت دی جائے گی
خصوصی افراد کو ماہانہ چھ سے آٹھ ہزار روپے وظیفہ جاری کیا جائے گا
لورالائی، پشین اور نصیرآباد میں خصوصی تعلیمی کمپلیکس قائم کیے جائیں گے
تمام سرکاری عمارتوں میں معذور افراد کی آسان رسائی کے لیے ریمپ تعمیر کیے جائیں گے

آئندہ بجٹ میں معذور خواتین کے لیے خصوصی سکیورٹیز کی فراہمی کو شامل کیا جائے گا
خصوصی افراد کے لیے بلوچستان اولمپکس کے انعقاد کا بھی اعلان کیا گیا
پارلیمانی سیکرٹری ولی محمد نورزئی نے اپنے خطاب میں کہا کہ حکومت خصوصی افراد کی فلاح و بہبود کے لیے جامع پالیسی تیار کر رہی ہے جبکہ ’’کومک پروگرام‘‘ کے اجرا سے ان کے دیرینہ مسائل کے حل کی راہ ہموار ہوگی۔ انہوں نے مزید کہا کہ وزیر اعلیٰ بلوچستان خصوصی افراد کے مسائل کے حل کے لیے سنجیدہ اقدامات اٹھا رہے ہیں اور صحت، تعلیم، فنی تربیت اور روزگار کے شعبوں میں عملی اقدامات کیے جا رہے ہیں۔
ان کا کہنا تھا کہ معذور افراد کے سرکاری کوٹے میں اضافہ کرتے ہوئے اسے پانچ فیصد سے بڑھا کر دس فیصد کرنے کی تیاری کی جا رہی ہے۔ انہوں نے خصوصی افراد کو صوبے کا قابلِ فخر اثاثہ قرار دیتے ہوئے کہا کہ وہ معاشرے کے باصلاحیت اور قابل افراد ہیں جنہوں نے ہر میدان میں اپنی صلاحیتوں کا لوہا منوایا ہے۔
تقریب کے شرکاء نے خطاب کرتے ہوئے کہا کہ خصوصی افراد معذور نہیں بلکہ ہمارے معاشرے کا فعال، باشعور اور باصلاحیت طبقہ ہیں۔ ان کی مدد کرنا ایک عظیم اور پیغمبرانہ عمل ہے، تاہم افسوس ہے کہ معاشرہ آج بھی انہیں مکمل طور پر قبول کرنے میں کامیاب نہیں ہوسکا۔ شرکاء کا کہنا تھا کہ کسی ایک عضو کی کمی کے باوجود خصوصی افراد بے پناہ قابلیتوں کے حامل ہوتے ہیں۔
تقریب کے اختتام پر ’’کومک پروگرام‘‘ کا باضابطہ افتتاح کیا گیا اور خصوصی افراد کی حوصلہ افزائی کے لیے سرٹیفکیٹس بھی تقسیم کیے گئے۔