وزیراعلیٰ بلوچستان کی زیر صدارت صوبائی بجٹ سے متعلق مشاورتی اجلاس

کوئٹہ میں وزیراعلیٰ بلوچستان میر سرفراز بگٹی کی زیر صدارت صوبائی بجٹ کے حوالے سے پارلیمانی کمیٹی کا مشاورتی اجلاس ہوا۔ اجلاس میں تعلیم، صحت اور عوامی فلاح کے منصوبوں پر تفصیلی غور کیا گیا اور تمام جماعتوں کی تجاویز کو شامل کرنے پر اتفاق کیا گیا۔

رپورٹ : محمد خان کاکڑ
کوئٹہ میں وزیراعلیٰ بلوچستان میر سرفراز بگٹی کی زیر صدارت صوبائی بجٹ سے متعلق پارلیمانی کمیٹی کا اہم مشاورتی اجلاس منعقد ہوا۔ اجلاس میں پاکستان مسلم لیگ (ن)، پاکستان پیپلز پارٹی، بلوچستان عوامی پارٹی، جماعت اسلامی اور اے این پی کے پارلیمانی رہنماؤں نے شرکت کی۔

اجلاس میں عوامی فلاح و بہبود، تعلیم، صحت، بنیادی سہولیات اور صوبے کی مجموعی ترقی سے متعلق منصوبوں پر تفصیلی مشاورت کی گئی۔

وزیراعلیٰ میر سرفراز بگٹی نے کہا کہ صوبائی بجٹ میں عوامی فلاح، تعلیم، صحت اور بنیادی سہولیات کے شعبوں کو ترجیح دی جائے گی جبکہ پسماندہ اور دور دراز علاقوں کی ترقی حکومت کی اولین ترجیحات میں شامل ہے۔

انہوں نے کہا کہ تمام سیاسی جماعتوں کی مثبت تجاویز کو بجٹ سازی کے عمل کا حصہ بنایا جائے گا اور محدود وسائل کے باوجود عوام کو زیادہ سے زیادہ ریلیف فراہم کرنے کی کوشش جاری رہے گی۔