محرم الحرام: پی ڈی ایم اے بلوچستان کے ہنگامی امدادی اور ریسکیو انتظامات مکمل

کوئٹہ: صوبائی ڈیزاسٹر مینجمنٹ اتھارٹی (پی ڈی ایم اے) بلوچستان نے 9 اور 10 محرم الحرام کے موقع پر مذہبی جلوسوں اور اجتماعات کے دوران عوام کے تحفظ کو یقینی بنانے کے لیے ہنگامی امدادی اور ریسکیو انتظامات کو حتمی شکل دے دی ہے۔

اس سلسلے میں پی ڈی ایم اے ریسکیو اسٹیشن میں ڈپٹی ڈائریکٹر پی ڈی ایم اے اصغر علی جمالی کی زیر صدارت ایک اجلاس منعقد ہوا جس میں محرم الحرام کے دوران ہنگامی صورتحال سے نمٹنے کے لیے کیے گئے انتظامات کا جائزہ لیا گیا۔

اجلاس میں مواصلاتی نظام، امدادی عملے کی تعیناتی، جلوسوں کے راستوں اور حساس مقامات پر ریسکیو ٹیموں کی موجودگی، ریسکیو آلات کی دستیابی اور امدادی گاڑیوں کی مکمل فعالیت کا تفصیلی جائزہ لیا گیا۔ اس موقع پر فوری ردعمل کی صلاحیت کو مؤثر بنانے اور متعلقہ اداروں کے درمیان رابطے کو مزید مضبوط کرنے پر بھی زور دیا گیا۔

ڈپٹی ڈائریکٹر پی ڈی ایم اے اصغر علی جمالی نے متعلقہ افسران اور عملے کو ہدایت کی کہ محرم الحرام کے دوران مکمل چوکسی اختیار کی جائے اور اس امر کو یقینی بنایا جائے کہ ریسکیو اہلکار، مواصلاتی نظام، آلات اور امدادی گاڑیاں ہر وقت مکمل طور پر فعال رہیں تاکہ کسی بھی ہنگامی صورتحال میں فوری امداد فراہم کی جا سکے۔